O Partido Popular de Vilalba mostra a súa preocupación polo “quinto ano consecutivo que os nenos e nenas quedan sen piscinas na área recreativa da Madalena” ante o “desinterese” por parte do goberno local.
Á falta desta oferta de ocio engádese que “tampouco mostran interese en buscar unha alternativa”, deixando sen unha previsión de oferta de ocio á poboación infantil en época estival, dado que “a día de hoxe tampouco se coñece a programación de actividades para o verán que en anos anteriores se desenvolvía baixo o nome de ‘Verán Activo’ co goberno do PP ou ‘Vilaescolas’ no anterior mandato co goberno do PSOE en minoría”, sinala a concelleira Paula Gesto.
Os populares condenan esta “falta de interese e organización” porque “afectará a todos os vilalbeses e vilalbesas e, sobre todo, á nosa poboación infantil”.
A ÁREA DA MADALENA, UN BLOQUE DE CEMENTO
O Grupo Municipal Popular considera as obras da área recreativa da Madalena na que o PSOE insistiu en gastar un millón de euros “un misterio baixo un bloque de cemento que nunca chega ao seu fin” porque “nin se aprecian avances significativos”.