A subdelegada puxo en valor o traballo que desenvolven as distintas Forzas e Corpos de Seguridade para garantir un Camiño seguro, “unha das nosas experiencias turísticas máis internacionais e para a que mobilizamos en Galicia máis de 3.600 efectivos”
A subdelegada do Goberno en Lugo, Isabel Rodríguez, destacou hoxe en Sarria o compromiso do Goberno co Camiño de Santiago con plans de seguridade e melloras nas rutas xacobeas durante a inauguración da III Xornada Internacional de Cooperación Policial Xacobea. A subdelegada puxo en valor o traballo que desenvolven as distintas Forzas e Corpos de Seguridade para garantir un Camiño seguro, “unha das nosas experiencias turísticas máis internacionais, que ano tras ano reúne centos de miles de visitantes de todo o mundo, e para o que mobilizamos en Galicia máis de 3.600 efectivos”.
Desta maneira, avanzou que este verán sete corpos policiais de Europa, Sudamérica e Asia están a traballar na coordinación do despregamento de efectivos para garantir a seguridade dos viaxeiros. Así, aproveitou para agradecer aos axentes procedentes de Italia, Brasil, Corea do Sur, Francia, Alemaña e Portugal “o apoio que nos dan para protexer aos viaxeiros, que é unha prioridade para o Goberno dentro do seu compromiso coa revitalización do Xacobeo”.
Na súa intervención, Isabel Rodríguez detallou varias das medidas levadas a cabo ao longo do territorio como o despregue das Oficinas Móbiles de Atención ao Peregrino, que, por terceiro verán consecutivo, percorre o Camiño dando asistencia aos viaxeiros e demostrando unha gran eficacia na resposta ofrecida. Tamén, fixo referencia á campaña informativa dirixida ás peregrinas #NoCaminasSola, que se estenderá a máis de 1.600 puntos localizados en zonas de peregrinaxe de toda Galicia.
Ademais, insistiu en que desde o Ministerio do Interior facilítase a aplicación de móbil ALERTCOPS, coa que se ofrece unha cobertura adicional a todo o trazado do Camiño, permitindo ao peregrino que o desexe contar con servizos como unha atención as 24 horas do día, así como chamadas e alertas localizadas en tempo real, todo iso en 7 idiomas diferentes.
Por outra banda, salientou o esforzo do Goberno de España destinado a numerosas accións de conservación e restauración de monumentos e lugares de interese nas diferentes rutas como Pedrafita do Cebreiro, Portomarín, Palas de Rei ou Paradela, “coas que poñemos a punto e preservaremos para o futuro o patrimonio histórico situado nos tramos galegos do Camiño, o que, sen dúbida, fortalecerá o potencial de Galicia para atraer máis visitantes”.
Isabel Rodríguez quixo salientar o exitoso traballo desenvolvido polas Forzas e Corpos de Seguridade nas rutas Xacobeas, con especial mención á Garda Civil “unha institución referencia no ámbito rural, e dun modo especial no Camiño, facilitando unha relación estreita e directa coa cidadanía, cos concellos, cos servizos municipais e co tecido social”.
Por último, a subdelegada lembrouse do servizo diario e cotián que desempeñan os diferentes colectivos, asociacións e ONGs, que grazas á súa acción conxunta na xestión da ruta compostelá conseguen atender as necesidades dos peregrinos e protexer os valores asociados á peregrinación.
Xornada centrada na atención ao peregrino
No transcurso da xornada os diferentes relatores transmitiron aos axentes presentes as diferentes peculiaridades do despregamento e método do traballo da Garda Civil, así como a importancia do Camiño de Santiago tanto no aspecto de roteiro de peregrinaxe como no do seu valor patrimonial e a importancia do labor policial para garantir a perfecta harmonía entre a atención e auxilio ao peregrino e para a conservación do propio Camiño.
No acto, tamén participaron o tenente coronel xefe da Comandancia de Lugo, o tenente coronel da Sección de Operacións do Estado Maior, o alcalde de Sarria, delegado territorial en Lugo, o presidente da Federación Galega de Asociacións de Amigos do Camiño de Santiago, membros da Asociación de Municipios do Camiño de Santiago Francés e o director de Accesibilidade Universal e Innovación da Fundación ONCE, entre outros.