O evento contará con once talleres de carácter gratuíto para os visitantes do acuario, que serán impartidos por persoal docente e alumnado da Universidade da Coruña.
Mañá sábado, día 3 de febreiro, de 10:00 a 14:00 e de 16:00 a 19:00 horas, terá lugar no Aquarium Finisterrae a sexta edición da Feira Científica Isabel Zendal. O evento está organizado polo grupo de divulgación científica e innovación docente da Universidade da Coruña, UDCiencia d+i, da Facultade de Ciencias e o Aquarium Finisterrae, xunto coa colaboración da Facultade de Enfermería e Podoloxía do Campus Industrial de Ferrol e o Centro de Investigación e Tecnoloxía Matemática de Galicia (CITMAGA).
A Feira Científica Isabel Zendal ofrecerá once talleres divulgativos impartidos por profesorado e alumnado dos Graos en Bioloxía, Química, Nanociencia e Nanotecnoloxía e Podoloxía da UDC, que serán de carácter gratuíto e estarán abertos a todas as persoas que visiten o acuario durante a xornada. Así, o público terá a oportunidade de descubrir diversas disciplinas científicas a través da participación en experimentos, xogos e actividades.
O evento enmárcase dentro do 25 aniversario do acuario, e para festexalo, algúns dos obradoiros centraranse en coñecer algúns dos animais máis característicos do espazo, como os tiburóns, as focas ou os peixes pallaso, así como aves mariñas, algas e outras temáticas como o aproveitamento da enerxía solar ou as matemáticas. Incluso haberá un dedicado á Real Expedición Filantrópica da Vacina, baixo o título “Os protagonistas da expedición”, no que docentes e estudantes irán caracterizados de Isabel Zendal, Francisco José Balmis, José Salvany e os nenos vacuníferos.
