Anuncia un Gran Pacto Galego pola Corresponsabilidade, poñer en marcha os centros de crise 24H de atención ás vítimas de violencia sexual, incorporar a educación afectivo – sexual no ensino regrado e camiñar cara á erradicación da prostitución
O candidato socialista á Presidencia da Xunta, José Ramón Gómez Besteiro, anunciou hoxe un gran acordo de país pola Igualdade efectiva co compromiso de dedicar o 1% e camiñar cara o 2% do Orzamento consolidado da Xunta ás políticas de Igualdade e contra as violencias machistas. Gómez Besteiro fixo este anunciou en Santiago coas cabezas de lista das candidaturas do PSdeG Patricia Iglesias -A Coruña-, Lara Méndez -Lugo-, Carmen R. Dacosta -Ourense- e Elena Espinosa -Pontevedra-, a presidenta do partido, Carmela Silva, e a secretaria de Igualdade, Silvia Fraga.
Gómez Besteiro explicou o gran pacto de país en materia de Igualdade para situar á axenda feminista como “eixo vertebrador” e transversal do futuro goberno progresista para unha sociedade máis xusta e igualitaria. A proposta súmase aos grandes acordos de emprego, rescate da sanidade pública e por uns salarios dignos presentados por Besteiro ata o momento.
Advertiu que “ningunha sociedade pode permitirse que máis da metade da poboación viva discriminacións e inxustizas por razón de sexo” e advertiu que “tampouco podemos permitirnos desaproveitar a metade do talento galego” que representan as mulleres. Sinalou a importancia de traballar na educación sexual e a igualdade no ámbito empresarial e propuxo Gran Pacto Galego pola Corresponsabilidade que incorpore a sindicatos e patronal.
Os socialistas galegos impulsarán un novo marco de relacións laborais que potencie a conciliación laboral e persoal, que ataque a fenda de xénero tanto en termos de emprego como de salario. Chamou a erradicar a fenda de xénero porque “non pode ser que unha muller, polo mero feito de selo, cobre menos que un home en idénticas condicións” ata o punto de que deixan de percibir o equivalente a un mes de salario ao ano.
Anunciou a creación do Instituto Galego da Muller, recuperando o organismo na defensa da igualdade entre mulleres e home que fora “fulminado” polo PP en 2010, ademais de acordar unha estratexia para estender a rede de Centros de Información á Muller -CIM- en colaboración coa Fegamp. Garantiu soporte técnico e económico para a súa pervivencia cunha programación estable de obradoiros, atención e prevención da violencia de xénero.
Violencia machista
O candidato socialista cualificou de “intolerable” o incremento dos delitos sexuais tamén en Galicia, onde se rexistraron tres mulleres asasinadas só durante o ano pasado, así como varios casos de violencia sexual en grupo, polo que reclamou poñer “tódolos esforzos do goberno galego” no obxectivo “irrenunciable” da violencia 0.
Besteiro anunciou que o seu goberno porá en marcha de maneira inmediata e simultánea nas catro provincias os centros de crise 24 horas de atención integral ás vítimas de violencia sexual, que serán estendidos de forma gradual a tóalas áreas sanitarias de Galicia. Garantirá ademais a creación de xulgados especializados en Violencia de xénero en cada cidade de Galicia e garantir unidades de valoración integral forense en todo o territorio galego.
O responsable socialista comprometeuse a loitar dende o ámbito da educación cumprindo coa Lei de Liberdade Sexual aprobada en 2023, que obriga a incorporar a educación afectivo – sexual ao ensino, con especial atención ao uso axeitado das novas tecnoloxías. Lembrou que o PP negouse a incorporar esta medida na Lei de Igualdade aprobada en novembro, rexeitando as emendas presentadas polos socialistas galegos.
Gómez Besteiro avogou por “camiñar dunha vez cara á erradicación da prostitución” a través de modificacións lexislativas contra os que se lucran a costa de explotar o corpo das mulleres prostituídas. Tamén defendeu impulsar cambios sociais acompañados de políticas públicas eficaces que ofrezan unha saída e acompañamento integral ás vítimas dunha práctica que debe quedar relegada a un mal recordo.
Fraude do PP
O candidato socialista reivindicou os avances en materia de Igualdade grazas aos gobernos do PSOE fronte á “fraude” que representa o PP, que “pola mañá defende a Igualdade pero pola tarde pacta con negacionistas e misóxinos, e o volverá a facer”, advertiu.
Pediu o voto para garantir o avance das mulleres en pé de igualdade fronte a un PP que elabora unha Lei de Igualdade que conxela a loita do feminismo, asumindo as teses dos seus socios da ultradereita e impide incorporar a educación afectivo – sexual no ensino regrado. Mentres, estancan as políticas de igualdade nos Orzamentos, quitándolles recursos propios do goberno galego ata depender unicamente das achegas procedentes do Estado.