A primavera tráenos dous novos e magníficos descubrimentos musicais con moito camiño de futuro na música galega: Husti e Daniela son as propostas gañadoras da sétima edición do concurso de música infantil e xuvenil Quero Cantar.
Nun Teatro Colón da Coruña ateigado de xente na tarde deste sábado, as propostas gañadoras foron quen de brillar con forza no escenario e engaiolar a público e xurado. Un xurado que, lembramos, nesta gala final estivo integrado por nenos e nenas e por mozos e mozas con formación musical e do mesmo abano de idade que as bandas e solistas seleccionadas para a final.
E a decisión final foi a seguinte:
Proposta gañadora na categoría infantil
HUSH é un grupo de seis nenas e nenos que estudan na escola ‘Entre Caixas’, de Calo, Teo. O seu é o rock clásico e a canción coa que se presentan ao concurso chámase «Estaría ben».
2º clasificado
@s Tareixas é un grupo de Redondela, integrado por un pai e os dous fillos, nena e neno, cunha canción sobre a súa avoa, titulada «A cadeira da avoa».
Proposta gañadora na categoría xuvenil
Daniela Montes é unha solista da Laracha que se acompañará na súa actuación co piano. Presentaranos unha canción de desamor titulada «Non todo era malo».
2º clasificado
Interestelares é un grupo de catro nenas e nenos de Cangas do Morrazo que chega ao concurso coa canción que titularon «Lume». A peza está inspirada nun suceso real: o incendio que ameazou gravemente a casa da compositora do grupo.
A responsable da área de Cultura da Deputación da Coruña, Natividade González, destacou a consolidación do certame Quero Cantar no panorama da música galega, unha iniciativa inédita para promover que nenas e nenos galegos «canten e creen en galego e a través da música» e animou a mocidade e familias a «empregar a nosa lingua a través da canción».
Premios
Os premios para os gañadores son os seguintes:
1º clasificado na categoría infantil:
*Gravación da maqueta en estudio profesional.
*Gravación dun videoclip da canción gañadora
*Material musical (instrumentos, equipamento…) e/ou produtos culturais en galego (libros, discos, cine, xogos..) por valor de 1.500,00 €.
1º clasificado na categoría xuvenil:
*Gravación da maqueta en estudio profesional.
*Participación no programa formativo do Quero Cantar
*Gravación dun videoclip, ben da canción presentada ao concurso, ben da creada no programa formativo.
*Material musical (instrumentos, equipamento…) e/ou produtos culturais en galego (libros, discos, cine, xogos..) por valor de 1.500,00 €.
2º clasificado en ambas as categorías:
*Gravación da maqueta en estudio profesional
*Material musical (instrumentos, equipamento…) e/ou produtos culturais en galego (libros, discos, cine, xogos..) por valor de 1.000,00 €.
3º clasificado en ambas as categorías:
*Gravación da maqueta en estudio profesional
*Material musical (instrumentos, equipamento…) e/ou produtos culturais en galego (libros, discos, cine, xogos..) por valor de 500,00 €.
Programa formativo
O Programa formativo Quero Cantar 2024 fai parte do premio que se outorga á proposta vencedora na categoría xuvenil da mesma edición do concurso e consta dos seguintes apartados:
• Titorización por parte dun ou dunha artista de recoñecida traxectoria na música galega para o desenvolvemento dunha canción.
• Período de convivencia nun espazo determinado pola Deputación para formación e desenvolvemento da canción.
• Asistencia a estudio profesional para a gravación do tema e obradoiro complementario sobre sonorización.
• Obradoiro «Kit de supervivencia para iniciarse no mundo da música»