Resalta a “experiencia” no eido económico de Reboredo para poñerse ao fronte dun organismo que “avaliará” iniciativas industriais, pero tamén fará “propostas para orientar accións de Goberno”
O presidente da Xunta, Alfonso Rueda, resaltou hoxe o importante papel da nova Oficina de Coordinación Económica, dependente da Presidencia, á hora de promover a posta en marcha de iniciativas empresariais estratéxicas para a comunidade.
“Creo que estamos maduros para crear este novo órgano porque isto significa que temos proxectos importantes enriba da mesa que necesitan ser coordinados”, indicou durante a toma de posesión de Juan Carlos Reboredo Nogueira como secretario xeral deste organismo. Rueda resaltou que é un profesional coa “experiencia” precisa no sector para poñerse ao fronte desta Oficina. Unha entidade desde a que se “avaliarán e coordinarán” diferentes proxectos industriais, pero tamén “se realizarán propostas para orientar as accións de Goberno cara certas metas ou obxectivos”, indicou Rueda.
Licenciado en Economía pola Universidade de Santiago, Reboredo é catedrático de Análise Económico nesta institución académica. Gran parte da súa carreira profesional estivo centrada na investigación sobre mercados financeiros e enerxéticos; a análise de riscos financeiros e o impacto do cambio climático nos mercados.