“Non hai beirarrúas e os veciños teñen que camiñar polo arcén ou incluso invadir a vía para desprazarse dende o cemiterio ata a parada do bus ou ir a pe ao camposanto”, segundo advirte o portavoz.
Os deputados provinciais Antonio Ameijide e Demetrio Salgueiro mantiveron unha reunión de traballo co portavoz, Manuel Rouco, e os concelleiros do PP de Burela para coñecer de preto a situación do Concello e algunhas das demandas dos veciños para darlles traslado tamén ante a Deputación de Lugo.
Os populares insisten en demandar ao goberno provincial de PSOE e BNG un espazo seguro para os peóns que circulan pola estrada de Vilaestrofe, a LU-P-1502, de competencia da Deputación de Lugo, no entorno do cemiterio municipal da Puída.
Concretamente sinalan que “non hai beirarrúas dende o cemiterio ata a parada de bus habilitada na marxe desta estrada provincial polo que os veciños teñen que circular pola calzada; xa sexa polo arcén ou, incluso, invadindo un carril da propia vía”.
O voceiro provincial, Antonio Ameijide, afea ao goberno de Tomé “que leve anos sen escoitar esta reivindicación dos veciños para garantir a seguridade dos peóns nesta vía de titularidade provincial”.
ACTUACIÓNS DEMANDADAS
Os populares cren que é necesario instalar beirarrúas ou unha senda peonil para evitar que os peóns teñan que compartir vía cos vehículos: “calquera destas actuacións favorecería a mellora da seguridade viaria”.
Tamén son necesarias as tarefas de limpeza das cunetas para unha correcta evacuación da auga da chuvia e a colocación de quitamedos na marxe da vía.