O BOP publica hoxe as bases destas novas axudas de PEL para profesionais autónomos con máis de 5 anos de actividade de municipios de menos de 10.000 habitantes
A Coruña, 19 de setembro de 2024. A Deputación da Coruña publica hoxe, 19 de setembro, as bases da nova liña de axudas PEL para persoas autónomas con máis de cinco anos na actividade e residencia fiscal en municipios coruñeses de menos de 10.000 habitantes.
As axudas están deseñadas para cubrir parte das cotas das persoas autónomas que non dispoñan de bonificacións ou reducións nos pagos da Seguridade Social, que poderán solicitar un apoio mínimo de 1.200,00 € (correspondentes a seis meses de cotas) e un máximo 2.400,00 € (correspondentes a toda a anualidade 2024).
Esta nova liña complementa ao programa PEL-Autónomos, que este ano xa concedeu axudas por importe doutros 2,3 millóns de euros a un total de 1.106 profesionais autónomos da provincia con menos de cinco anos de actividade e sede social nun concello de menos de 20.000 habitantes
O presidente da Deputación, Valentín González Formoso subiñou «a importancia clave dos autónomos na economía e na creación de emprego en Galicia», un colectivo ao que pertencen máis de 205.000 persoas na nosa comunidade. «Por iso decidimos ampliar a liña de axudas a autónomos, que cada ano é unha das máis demandadas do PEL e crear tamén axudas para aqueles que teñen mais de cinco anos de actividade, atendendo así unha demanda dos propios colectivos de autónomos», apuntou.
O presidente incidiu tamén en que as axudas van destinadas aos profesionais que exercen nos concellos de menor tamaño da provincia, co obxectivo de «favorecer o emprego e contribuír á fixación de poboación no rural, un dos obxectivos estratéxicos do goberno provincial no presente mandato».
Coa finalidade de reforzar o apoio ás empresas da provincia enmarcada nos sectores estratéxicos emerxentes, priorízanse tamén nestas axudas PEL aquelas iniciativas empresariais con actividades económicas enmarcadas en determinados sectores correspondentes a estatexias estatais e europeas.Estas liñas de axudas a autónomos forman parte do Plan de Emprego Local ( PEL), unha aposta transversal do Goberno da Deputación á que se destinaron 106 millóns de euros nos últimos anos a través de diferentes axudas para contratar persoal, impulsar o emprendemento, apoiar o crecemento dos pequenos negocios e dos traballadores e traballadoras autónomos. Desde o seu inicio, o PEL permitiu a creación de 7.046 empregos nos sectores público e privado.