Xa está habilitada a prevenda de entradas para o persoal membro do Circo do Sol. Mañá, xoves, disporanse en LiveNation, e será este venres 27, ás 10.00 horas, cando se habilitará a venda ao público xeral.
O Coliseum abrirá as súas portas o ano que vén ao Circo do Sol, que volve á Coruña na súa nova xira do espectáculo ‘Corteo’, unha produción estreada no ano 2005 na cidade canadense de Montreal e que, desde entón, tivo un público de máis de dez millóns de persoas en 22 países distintos de catro continentes.
‘Corteo‘, que significa cortexo en italiano, é unha procesión alegre, un desfile festivo imaxinado por un pallaso. O espectáculo, dirixido por Daniele Finzi Pasca, reúne a paixón do actor coa graza e o poder do acróbata para somerxer o público nun mundo teatral de diversión, comedia e espontaneidade situado nun espazo misterioso entre o ceo e a terra.
A Coruña será a segunda parada da xira en España, tras Barcelona. Hai un total de trece funcións previstas na cidade herculina, que terán lugar entre finais do mes de abril e inicios do mes de maio.
A venda para o público xeral, desde este venres 27 ás 10.00 horas
A prevenda exclusiva de entradas de ‘Corteo’ para as membras e membros do Circo do Sol habilitouse este mércores pola mañá, e será mañá, xoves 26, a partir das 10.00 horas, cando se activará a prevenda de Live Nation.
Xa este venres 27, ás 10.00 horas, habilitarase a venda para o público xeral tanto na web oficial do Circo do Sol como nos portais web de LiveNation, Ticketmaster e o Corte Inglés, tamén a través de Ataquilla e no despacho de billetes da praza de Ourense.