Despois de que pasara xa máis dunha semana da celebración do Festival Caudal Fest na contorna do río Miño, grande parte do lixo alí vertido segue a amorearse sen que o persoal de limpeza municipal se faga cargo da recollida de todos estes restos da festa. Sumado a isto, a pasada fin de semana celebrouse outro evento de grande magnitude no Pazo de Feiras e Congresos de Lugo, o Jarana Fest, deixando tras de si un cúmulo de botellas, envoltorios, plásticos, cabichas, vasos e demais lixo.
Ante as demandas de explicacións da veciñanza, o Concello limitouse a respostar, que esta fin de semana celebrouse un «botellón» na contorna do río e os restos de lixo debíanse a este tipo de celebracións.
Basta con dar un pequeno paseo pola contorna do río para ver moreas de vasos co logo do «Caudal Fest», para comprobar que continúan sen recoller os restos do pasado festival.
Desde Esquerda Unida reclamamos ao Concello de Lugo, tamén ás outras administración públicas colaboradoras (Deputación e Xunta de Galicia) que esixa, á hora de conceder grandes partidas orzamentarias, subvencións ou contratos para a celebración de festivais, especialmente, macrofestivais coma o Caudal Fest -que congregou a 40.000 persoas segundo a organización- uns mínimos estándares de calidades medioambiental e, ao igual que precisamos que os eventos culturais que se desenvolven na cidade, con cartos públicos, consideren a perspectiva de xénero, demandamos que eses eventos culturais conten con persoal encargado de velar polo debido cumprimento das normas de seguridade ambiental, tanto á hora da montaxe do festival para á hora a desmontaxe, para evitar que todos este lixo remate verténdose no río.
«Restos de malla do recinto, bridas, material de montaxe e desmontaxe, todo isto, sumado ás cabichas, botellas, vasos, bolsas, poden acabar vertidos no río ou sendo alimento tóxico para a fauna que convive na contorna do río Miño coas nosas veciñas e veciños» -reitera Chus Rodríguez, desde a organización Esquerda Unida-. Ao fío disto, sinala Rodríguez que «onte na prensa falaban desde a organización do Caudal Fest dun retorno económico próximo aos 9 millóns de euros para a cidade, gustaríanos saber blanco sobre negro como está calculado e en que exactamente retornou, porque o que si temos claro é que en grandes cantidades de lixo si».
