Repartirán as axudas o Cromático Mural Fest (Cambre), Rexenera Fest (Carballo), Expresa Oleiros Urban Fest, Festival Viladomar (Rianxo) e DesOrdes Creativas (Ordes)
Hoxe coñeceuse o orzamento final do programa DP0040 da Deputación da Coruña, dirixido a concellos da provincia para a realización en 2025 festivais de arte pública urbana na modalidade de pintura mural. Serán 149.770 euros, que se repartirán cinco eventos: o Cromático Mural Fest, de Cambre (35.000 €), o Rexenera Fest, de Carballo (35.000 €), Expresa Oleiros Urban Fest (23.350 €), Festival Viladomar, de Rianxo (21.920 €) e DesOrdes Creativas, de Ordes (34.500 €).
O vicepresidente provincial e titular de Turismo, Xosé Regueira, destacou a importancia da liña de subvencións: «Contribúen ao potencial da arte urbana, unha disciplina que permite visualizar un produto turístico atractivo e ofrece unha alternativa para dar a coñecer un destino desde outra óptica, alcanzando un tipo de visitante que ata hai poucos anos tiñamos esquecido».
«A arte urbana», engadiu, «converteuse nos últimos anos en soporte para a creación artística de cada vez máis municipios da provincia, e parte importante é o apoio que lle prestamos desde a Deputación». O vicepresidente falou tamén de relevancia que teñen este festivais xa non só para o turismo, «senón tamén para as mesmas localidades, pois son quen de rexenerar espazos empobrecidos por políticas urbanísticas nefastas».
Con todo, o máis importante destes festivais para Regueira é que «son quen de xerar identidade; en especial, en concellos urbanos e áreas metropolitanas, algúns de cuxos barrios teñen unha arquitectura máis degradada».
