O Plan Único (POS+2025) da Deputación da Coruña acada os 116 M€ e marca un novo récord histórico de investimento

Formoso destaca que a Deputación xa inviste máis nos 93 concellos coruñeses que a Xunta de Galicia nos 313 concellos das catro provincias galegas e demanda á administración autonómica incrementar a 200 millóns o Fondo Galego de Cooperación Local.

O pleno da Deputación da Coruña aprobou hoxe por unanimidade un expediente de modificación de créditos que permite ampliar en 30 millóns de euros o orzamento do Plan Único (POS+2025), que alcanza así os 116 millóns de euros, a maior cifra anual desde a posta en marcha deste programa.

Esta nova achega reforza o carácter estratéxico do Plan Único como o maior plan de  investimento municipal das catro deputacións galegas e un dos máis ambiciosos de todo o Estado, tanto polo seu volume económico como polo seu impacto directo no territorio.

O presidente da Deputación, Valentín González Formoso, salientou que «a Deputación da Coruña está a demostrar con feitos o seu compromiso cos concellos, apoiándoos con recursos reais e sen condicionar o seu uso, porque son os propios concellos os que mellor coñecen as súas necesidades».

Formoso puxo en valor o Plan Único como «un modelo de cooperación entre administracións que multiplicou por catro o investimento nos concellos, que funciona e que xera resultados medibles», e lembrou que por primeira vez «este ano, a Deputación da Coruña inviste máis nos 93 concellos da provincia que a Xunta de Galicia nos concellos das catro provincias galegas».

Por este motivo, instou de novo á administración autonómica a incrementar o Fondo de Cooperación Local ata un mínimo de 200 millóns de euros, unha cifra «razoable e necesaria para garantir o funcionamento dos pequenos e medianos concellos de Galicia, que cada vez asumen máis competencias sen os recursos correspondentes».

Aprobadas as primeiras 239 obras deste ano 

O pleno provincial deu tamén hoxe luz verde ás primeiras 239 obras do POS+2025, que foron previamente aprobadas nos respectivos plenos municipais. Estes proxectos supoñen un investimento conxunto de 32.981.225 euros (incluindo 2,5 millóns de achegas municipais), e abranguen ámbitos tan diversos como infraestruturas, accesibilidade, mellora de equipamentos, renovación de espazos públicos ou servizos básicos.

Por tipoloxía, a maioría das obras mellorar camiños, estradas municipais e accesos a núcleos rurais (134), pavimentacións e alumeado (45), redes de saneamento e abastecemento de auga (31), melloras en instalacións culturais, deportivas e docentes (21), centros sociais (3) ou parques públicos (5).

Por ámbito territorial, a comarca con maior número de obras será a de Compostela, con 76 obras aprobadas por importe de 9.143.825 €; a da Coruña, con 51 obras por 9.383.526; Ferrolterra, Eume e Ortegal, con 49 proxectos por 6.107.773 euros; Bergantiños e Costa da Morte, con 44 proxectos por 5.922.789 euros e Barbanza, con 19 obras por 2.423.311 euros.

Ademais, o Plan destina este ano 35,7 millóns de euros a gasto corrente, para garantir servizos esenciais como alumeado público, mantemento de vías municipais, recollida de lixo ou conservación de instalacións; 7 millóns de euros a gastos sociais, reforzando a atención á cidadanía máis vulnerable; 12 millóns de euros para amortización de débeda e financiamento de servizos nos concellos sen débeda.

A partida adicional de 30 millóns aprobada hoxe estará destinada íntegramente á execución de obras, que se aprobarán nos plenos dos concellos coruñeses.

Un dos piares fundamentais do Plan Único é o seu modelo de xestión descentralizado, que outorga aos concellos total capacidade para decidir o destino dos fondos en función das súas necesidades.

Desde a súa creación en 2017, o Plan Único leva investidos máis de 800 millóns de euros nos 93 concellos da provincia da Coruña, facendo posible a execución de 4.592 obras e proxectos que melloran a vida da veciñanza e fortalecen os servizos públicos no ámbito local.

O Plan Único consolidouse como un referente no seu ámbito, tanto polo seu volume económico como polo seu deseño baseado na transparencia, na equidade e na plena autonomía local. Grazas a este modelo, moitos concellos coruñeses puideron desenvolver políticas públicas que doutro xeito serían inviables, reducindo desigualdades e mellorando a calidade de vida no rural e nas zonas urbanas.