Nicole Grueira sinala que “o alcalde ten sorte de que a débeda sexa dunha administración pública, porque se chega a ser dunha familia xa hai anos que lle terían cortada a luz”.
“O Concello de Pol está ao límite”. Non se trata dunha frase feita que empregue a voceira popular, Nicole Grueira, senón que é unha realidade á que aporta datos e documentación.
Neste senso, Nicole Grueira sinala que dende o ano 2022 o Concello de Pol acumular unha débeda de 2.579.519,05€ en facturas de provedores, da luz e doutros servizos.
“Lino Rodríguez ten sorte de que é unha administración pública a que debe esa cantidade, xa que de ser unha familia xa lles terían cortado a luz hai moitos meses, pero nos estamos aproximando ao día no que os traballadores públicos cheguen ao Concello e non haxa subministro eléctrico”, afirmou.
Unha cantidade que se desglosa da seguinte forma:
– Ano 2023: 405.859,45€
– Ano 2024: 349.249,85€
– No que vai de ano 2025: 73.234,84€
Pero estas non son as únicas débedas recoñecidas por parte do Concello de Pol, xa que tamén se deben facturas doutro tipo de subministros:
– Ano 2023: 9.214,66€
– Ano 2024: 195.950,44€
– No que vai de ano 2025: 169.918,51€
DÉBEDAS A PROVEDORES
Nicole Grueira tamén explica que Lino Rodríguez acumula “inxentes cantidades de diñeiro en impagos a provedores “só dos anos 2022 e 2023, que son aos que tivemos acceso”.
– Ano 2022: 312.939,02€ pendentes de pago
– Ano 2023: 1.063.152,28€ pendentes de pago
En total a débeda a provedores ascende, polo menos, a 1.376.091,30€. “Imaxinamos que esta débeda é moito maior xa que non tivemos acceso aos datos de 2024 e ao que vai de 2025, pero con estes datos todos os veciños de Pol entenden perfectamente que non haxa ningunha empresa nin autónomo que queira traballar para o Concello de Pol”, denunciou.
Nicole Grueira afirma que “Pol precisa de medidas urxentes” de contención do gasto e un plan de pago a provedores e dos subministros xa que “estamos chegando ao día no que os traballadores non teñan luz en dependencias municipais ou que directamente non se poidan aboar as nóminas”.
