Durante a semana comprendida entre o 23 e o 29 de xuño, a Policía Local de Lugo intensificou o seu plan integral de control da seguridade viaria, abordando diversos frontes que inclúen a condución baixo os efectos do alcohol ou drogas, a vixilancia de VMP (patinetes eléctricos), os excesos de velocidade e a localización de vehículos con ordes de precinto por débedas.
Dúas alcolemias positivas en patinetes
Nesta ocasión destacan dúas intervencións sobre condutores de VMP que arroxaron resultados de 0,53 e 0,49 mg/L e 0,64 e 0,64 mg/L respectivamente. Estes rexistros volven poñer de relevo unha problemática cada vez máis frecuente: o uso do patinete como “medio alternativo” para circular despois de ter consumido alcohol.
Desde a Policía Local lémbrase, tal e como se vén insistindo en campañas e reportaxes recentes, que conducir un patinete baixo os efectos do alcohol ou drogas supón un risco directo para o propio usuario e para o resto de peóns, especialmente en zonas peonís e carrís compartidos. Este tipo de infraccións detéctanse con controis específicos e demostran que estamos vixiantes e comprometidos con atallar estas condutas imprudentes.
Outras alcolemias administrativas e penais
Ao longo da semana rexistráronse ademais 4 alcolemias administrativas, con taxas de:
- 0,48 e 0,51 mg/L
- 0,57 e 0,59 mg/L
- 0,61 e 0,63 mg/L
- 0,33 e 0,35 mg/L
Estas actuacións evidencian que, malia o constante labor de prevención e vixilancia, aínda son numerosos os condutores que se poñen ao volante tras ter consumido alcohol, superando os límites establecidos. Súmase tamén unha alcolemia penal con taxas de 0,80 e 0,77 mg/L, trasladándose as dilixencias correspondentes ao xulgado.
Positivos en drogas e condución sen permiso
Neste control integral, detectouse igualmente un condutor que arroxou resultado positivo en cocaína, procedéndose á denuncia e ás probas complementarias de laboratorio. Así mesmo, localizouse e instruíuse atestado a outro condutor que carecía de permiso de condución, reforzando con iso o principio de que a estrada é un espazo común onde todos debemos cumprir as mesmas regras.
Caso especial por negativa á segunda proba
Destaca ademais unha intervención particular na Rúa Ramos Misioné, onde a Unidade de Policía Xudicial de Tráfico, tras ser requirida pola Unidade Territorial de Policía de Barrio, realizou a proba de alcolemia ao condutor dun vehículo, arroxando un resultado positivo moi elevado (1,11 mg/L) na primeira medición. O condutor negouse a someterse á segunda proba regulamentaria, o que constitúe un delito contra a Seguridade Viaria segundo o artigo 383 do Código Penal, dando inicio ao expediente xudicial correspondente.
Controis de velocidade
Dentro dos dispositivos semanais realizáronse controis de velocidade en puntos sensibles da cidade:
- Na Avenida Infanta Elena controláronse 74 vehículos, con 4 denuncias formuladas.
- Na Ronda das Fontiñas, de 77 vehículos controlados, detectáronse 9 excesos de velocidade.
Estas medidas buscan frear condutas de risco, especialmente en tramos onde se comparte calzada con peóns, ciclistas ou pasos de peóns moi transitados.
Vehículo precintado por orde da Seguridade Social
Finalmente, procedeuse á retirada e precinto dun vehículo buscado pola Seguridade Social debido a débedas acumuladas. Estas actuacións, aínda que menos visibles, son esenciais para garantir que todos cumprimos coas nosas obrigas. A evasión de impostos ou cotizacións prexudica a quen cumpre e contribúe a soster os servizos comúns.
Vixilancia constante para unha mobilidade segura
Desde a Policía Local de Lugo destácase a profesionalidade e dedicación dos axentes intervinientes neste control integral, que reafirma o noso compromiso diario coa prevención de sinistros viarios e a protección de toda a cidadanía. Lémbrase unha vez máis que a seguridade nas nosas rúas é unha tarefa compartida: a responsabilidade individual e o respecto ás normas salvan vidas.
