Un grupo de artistas organiza un acto contra o xenocidio en Gaza e a prol da autodeterminación de Palestina
Música, cinema e poesía contra o xenocidio israelí en Gaza e a prol da autodeterminación de Palestina: ese é o resumo do acto que un grupo de artistas galegos e galegas organizan o 26 de xullo na Oficina Rúa de Santiago de Compostela (rúa San Pedro, 52). A entrada ao acto será por billeteira inversa. O recadado doarase á Axencia das Nacións Unidas para as persoas Refuxiadas de Palestina (UNRWA). O programa, que comezará ás 18:00 horas, é o seguinte:
18:00. CINEMA
Película urxente por Palestina. Alberte Pagán, 2012
Schakale und araber. Jean-Marie Straub, 2011
18:30. ENTREVISTA
Charo Lopes falará con Alberte Pagán sobre a súa experiencia na Marcha a Gaza.
19:30. POESÍA
Lectura de poemas de Mahmoud Darwish.
20:00. CONCERTOS
Võ Chí Công Ensemble
O’ Leo de Matamá
Estas son as persoas participantes:
Alberte Pagán é un dos máis importantes cineastas galegos da actualidade. Especialista en cinema experimental, autor de decenas de filmes, tamén é novelista, poeta, ensaísta e tradutor, e militante internacionalista de longa data.
Jean-Marie Straub é un cineasta francés morto en 2022 aos 89 anos. A súa obra fílmica, realizada en boa parte canda Danièle Huillet, é unha das propostas máis política e esteticamente radicais das artes do século XX.
Charo Lopes é xornalista, fotógrafa e poeta, autora dos libros De como acontece a fin do mundo (2015) e Álbum (2019).
Mahmoud Darwish (1941-2008) é o máis célebre dos poetas palestinos do século XX, nado en Al-Birwa e morto nos Estados Unidos. Existe unha antoloxía dos seus poemas traducida ao galego por Moncho Iglesias, Carné de identidade (2012).
Võ Chí Cong Ensemble é un quintento composto por Marcos Flórez (baixo e percusión), Che Garrido (saxo, frautas, percusión), Luís Garrido (saxofóns), Alexandre Losada (guitarra e percusións) e Daniel Salgado (percusión e textos) cuxa música se move entre a libre improvisación, o ruidismo e unha aproximación antiacadémica a certo jazz.
O’Leo de Matamá é un dos máis activos músicos da escena galega, ademais de poeta e actor. Na súa penúltima reinvención propón unha emocionante achega á canción de intervención desde unha óptica punk.
A Oficina Rúa é un espazo dedicado ás artes aplicadas -taller, tenda-, localizado no número 52 da rúa San Pedro de Santiago de Compostela, promovido polas artistas Xoana Almar, Miguel Peralta e Novenoel.
O acto por Palestina conta coa colaboración do Colectivo Colapso e da tenda Discos El Muelle.
