A Asociación de Turismo e Hostalería Compostela (ATHC) e Unión Hotelera Compostela escenificaron esta tarde na Praza do Obradoiro o seu rotundo rexeitamento á taxa turística. Nun encontro que reuniu ao presidente da ATHC, Ramón García, e á directiva Sara Santos, o sector quixo deixar clara a súa postura a só dous días do Pleno no que o Concello de Santiago prevé aprobar definitivamente esta medida.
Os representantes do sector cualificaron a taxa de «inxusta, mal deseñada e precipitada». Segundo Ramón García, esta decisión «responde a intereses meramente políticos e non xerais».
Entre outras críticas, as asociacións lamentaron que a nova taxa, «lonxe de ordenar o turismo, penaliza inxustamente ao visitante que pernocta na cidade». Pola contra, «ignora a quen realmente xera saturación urbana», como son os excursionistas, cruceiristas ou grupos organizados que só permanecen unhas horas na capital galega.
