Desde Insubmisas Contra o Rearmamento expresamos todo o noso apoio ás caceroladas convocadas para mañá en diferentes lugares de Galicia como mostra de solidariedade co pobo palestino e denuncia fronte ao xenocidio en Gaza.
Estas accións ruidosas son necesarias: facer soar cazolas é romper o silencio cómplice, visibilizar a inxustiza e afirmar que non imos calar mentres se perpetra unha masacre con total impunidade e coa complicidade da Unión Europea e do Estado español.
Como colectivo antimilitarista, feminista e internacionalista, chamamos a todas as persoas e organizacións sociais, culturais, sindicais e políticas a sumarse e espallar estas mobilizacións por todo o país.
Cómpre encher as rúas de ruído e dignidade, para denunciar o apartheid, a colonización e o exterminio sistemático do pobo palestino.
Porque o ruído é solidariedade, denuncia e compromiso coa vida.
Convidamos tamén á cidadanía galega a participar na:
Cacerolada Global por Palestina
📍 Praza do Toural – Santiago de Compostela
🗓️ Venres 1 de agosto
🕗 Ás 20:00 h
Sumámonos ao chamamento internacional da cineasta e xornalista palestina Bisan Owda, quen apela ao mundo enteiro a erguerse contra o xenocidio. É hora de actuar, de facer da nosa loita diaria unha extensión da súa resistencia.
