A portavoz do Partido Popular, Elena Candia, sinala que as reunións de escoita activa do Grupo Municipal na zona rural de Lugo sempre revelan o mesmo problema: o abandono sistemático por parte do Goberno local.
O caso da escola de Labio é a proba máis contundente do desinterese de PSOE e BNG polo patrimonio e a vida das parroquias. Esta obra, inacabada dende 2010, representa un exemplo de cartos públicos malgastados e de promesas incumpridas.
Un proxecto que se converteu nunha ruína
En 2009, o Concello de Lugo comezou a rehabilitación da escola de Labio a través dun obradoiro de emprego, financiado con máis de medio millón de euros do Fondo Social Europeo. O proxecto tiña como obxectivo a rehabilitación integral do edificio.
Non obstante, as obras quedaron a medias. A planta alta foi demolida e nunca se repuxo o tellado, deixando o inmoble exposto ás inclemencias do tempo dende 2010. O edificio, que está incluído no Catálogo de Elementos, presenta hoxe un estado de ruína absoluta.
Patrimonio perdido e responsabilidade política
Durante a intervención, retiráronse as ventás orixinais do edificio, que tiñan un gran valor arquitectónico e patrimonial. Hoxe, quince anos despois, non se sabe nada do seu paradoiro.
Cando o obradoiro rematou, a responsabilidade de finalizar os traballos recaía no Concello, pero nin o PSOE nin o BNG se preocuparon por rematar a obra. Esta inacción é un claro símbolo do abandono que sofren as parroquias rurais e o seu patrimonio.
