O deputado Oscar Insua, que se reuniu xunto co edil Serxio Domínguez cos pais e nais do CEIP Vila de Cee e IES Agra de Raíces, presenta iniciativas que recollen as peticións de máis persoal especializado para crianzas con necesidades especiais, e non entende como ano tras ano “o PP segue escatimando recursos na educación pública, parece un divertimento”.
O BNG da Costa da Morte, da man do deputado Oscar Insua, vén de presentar varias iniciativas no Parlamento galego para reclamar á Xunta de Galiza que atenda ás demandas das familias de Cee e Muxía para incorporar máis docentes especialistas en atención a alumnado con necesidades especiais nos centros escolares da comarca.
O parlamentario nacionalista solicitou a restitución de maneira inmediata dos postos docentes suprimidos no curso 2025-2026, garantindo o mantemento das condicións dos cursos anteriores, así como a incorporación de máis mestres de apoio e persoal auxiliar coidador naqueles colexios onde sexa necesario debido ao incremento de alumnado con necesidade especiais.
A formación nacionalista indicou que varios centros educativos da bisbarra están a ver como perden recursos humanos esenciais para garantir unha educación de calidade, en maior medida mestres ou mestras de apoio e especialistas de atención á diversidade. “Ou aumenta o profesorado ou acabará diminuíndo a atención individualizada e teremos unha sobrecarga para os equipos docentes. Non entendemos como o PP pode escatimar recursos na educación”, subliñou.
Oscar Insua, xunto co voceiro municipal do BNG de Cee, Serxio Domínguez Louro, trasladaron o seu apoio ás familias que están a sufrir os recortes educativos da Xunta de Galiza no CEIP Plurilingüe “Vila de Cee” e no IES “Agra de Raíces”, logo de reunirse con pais e nais de estudantes para recoller as demandas existentes neste comezo de curso escolar.
Os representantes nacionalistas puideron constatar que no caso do colexio “Vila de Cee”, o alumnado precisa de máis horas á semana de pedagoxía terapéutica (PT), ao igual que nos CEIP Virxe da Barca e CEIP Os Muíños no concello de Muxía, que perderon unha mestra de PT compartida, con respecto ao curso pasado, a pesar de que este ano aumentaron os alumnos con necesidades educativas.
Respecto ao instituto Agra de Raíces de Cee, o BNG salientou que no curso pasado, e nos tres cursos anteriores, o instituto contou con 2 PT’s, 1 coidadora e 1 AL (Audición e Linguaxe) compartida. E sinalou que este ano dito centro ceense comezou o curso cunha soa PT e 1 Auxiliar Técnico Educativo (coidador/a) para todo o instituto, cando as necesidades se triplicaron, ao aumentar o número de alumnado con NEE e NEAE. “A semana pasada enviaron outra PT, mais o centro precisa de catro mestras de pedagoxía terapéutica para que os programas e proxectos educativos implantados ata o momento sexan viables; os pais e nais deste centro demandan ademais a necesidade de ter alomenos outra coidadora máis”, advertiu o grupo nacionalista.
Oscar Insua manifestou que “o Partido Popular da Xunta non se cansa de repetir todos os anos a mesma historia, parece un xogo no que se divirten recortando profesorado. O que para a Xunta son números, para os pais e nais é unha oportunidade que perden os seus fillos, unha oportunidade na formación que non pode fallar porque pode repercutir moito no futuro dos rapaces, sobre todo dos que teñen necesidades especiais”.
