Os parlamentarios do PSdeG, César Mogo e Patricia Otero, aseguraron no Senado e no Congreso que o Executivo seguirá respectando os procedementos legais no proxecto de Altri en Palas de Rei. Recordaron que o Goberno xa lle denegou unha subvención á pasteira por non cumprir os requisitos, mentres a Xunta aprobou a súa declaración de impacto ambiental.
O senador César Mogo cualificou de «difícil de entender» a postura do BNG, que nunha mesma iniciativa reclamaba que o Estado examinase exhaustivamente o proxecto, pero ao mesmo tempo o rexeitase de antemán, sen atender a ningunha consideración xurídica. Pola súa banda, a deputada Patricia Otero criticou o Partido Popular por pedir que se lle dean fondos «si ou si» aínda que non cumpra os requisitos, e o Bloque por esixir que «non se lle dean aínda que cumpra».
Defendeu que o Goberno actúa de xeito «escrupuloso» conforme á normativa, garantindo a seguridade xurídica de todos os proxectos. Otero remarcou que foi o Goberno central o que denegou a Altri os fondos da liña 4 do Perte de descarbonización por non cumprir os criterios, o que demostra a súa prudencia e rigor.
