A vicerreitora do Campus de Ferrol e Responsabilidade Social, Ana Ares, recibiu, este mércores, no Salón de Actos Concepción Arenal, aos primeiros 58 estudantes estranxeiros e de mobilidade nacional que se incorporan ao Campus Industrial de Ferrol neste primeiro cuadrimestre. Esta cifra verase incrementada ao longo das próximas semanas con novas incorporacións de alumando e de persoal investigador quen se achegará ata a cidade departamental para continuar coa súa formación, realizar prácticas académicas ou estadías de investigación.
Estes primeiros 58 estudantes estranxeiros proceden de Arxentina, Brasil, Cabo Verde, Camboia, Eslovaquia, Francia, Alemaña, Italia, República Checa, Polonia, Portugal, Lituania, Reino Unido, Corea e de México. Nesta primeira quenda, tamén se inclúe a alumnado doutros puntos de España grazas ao programa de mobilidades nacionais SICUE, promovido pola Conferencia de Rectores de las Universidades Españolas (CRUE). Todos eles e elas cursarán os seus estudos na Escola Politécnica de Enxeñaría de Ferrol (EPEF), na Escola Universitaria de Deseño Industrial (EUDI), na Facultade de Ciencias do Traballo (FCT), na Facultade de Enfermaría e Podoloxía (FEP) e na Facultade de Humanidades e Documentación (FHD).
