O delegado territorial da Xunta en Lugo, Javier Arias, sumouse hoxe ao acto organizado na cidade pola Asociación Española Contra o Cancro (AECC) e El Progreso con motivo do Día Mundial de loita contra o cancro de mama.
Arias destacou a aposta da Xunta polos programas de cribado, “que están a demostrar a súa efectividade ao detectar a enfermidade en estadíos precoces”, apuntou. Remarcou que Galicia é pioneira na introdución e ampliación de plans de cribaxe como o do cancro de mama, o de cérvix e o colorrectal.
O delegado lembrou que a loita contra o cancro é unha das prioridades da sanidade pública galega e, nese sentido, subliñou os investimentos realizados nos últimos anos para dotar o HULA de alta tecnoloxía para diagnosticar a enfermidade; a ampliación dos programas de detección precoz ou o incremento dos recursos destinados á investigación clínica no hospital lucense, na procura de solucións avanzadas e eficaces para mellorar a saúde dos pacientes.
