O Presidente da Deputación de Lugo, José Tomé Roca, encabezará a vindeira semana unha misión institucional e empresarial de alto nivel á rexión do Río da Prata, organizada en colaboración coa Confederación de Empresarios de Lugo (CEL). O obxectivo principal é reforzar os lazos con Uruguai e Arxentina, impulsar a internacionalización do tecido produtivo lucense e proxectar a provincia como un territorio moderno e competitivo en mercados estratéxicos.
A intensa axenda dunha semana de duración combina a diplomacia institucional co impulso económico. O Presidente Tomé Roca manterá reunións clave co obxectivo de abrir portas ás empresas lucenses:
En Montevideo (Uruguai):
- Reunións coa Embaixada de España e diversos Ministerios.
- Encontros coa Cámara de Industrias do Uruguai, o Instituto Nacional de Loxística e o organismo Uruguai XXI (promoción de investimentos e exportacións).
- Diálogo con entidades industriais para explorar oportunidades de colaboración en innovación e dixitalización no sector agroalimentario.
En Bos Aires (Arxentina):
- Programa institucional centrado na colectividade galega e na cooperación cultural e económica.
Apoio Estratéxico á Internacionalización
Tomé Roca subliñou o carácter estratéxico da viaxe e o compromiso coa internacionalización: «Esta misión é unha acción estratéxica que combina diplomacia institucional e impulso económico. Imos abrir portas, establecer contactos e reforzar a presenza da provincia de Lugo nun espazo internacional onde se decide parte do noso futuro”.
O mandatario destacou a importancia de que a Deputación acompañe e apoie institucionalmente ás PEMEs lucenses para que poidan «medrar, innovar e internacionalizarse».
A misión é froito da colaboración entre a Deputación e a CEL, demostrando que “cando administracións e empresas traballan da man, os resultados multiplícanse”. A Deputación pon a súa capacidade diplomática «ao servizo das pemes lucenses».
Uruguai e Arxentina foron escollidos como destinos pola súa estabilidade institucional, o seu peso no Mercosur e a profunda conexión coa emigración galega. Tomé Roca concluíu: «Galicia e América Latina comparten lingua, valores e historia; agora queremos transformar esa irmandade en oportunidades económicas e culturais de ida e volta”.
Esta iniciativa reafirma o compromiso da Deputación cun modelo de provincia aberta, dinámica e conectada co exterior.
