O secretario xeral do PSdeG, José Ramón Gómez Besteiro, instou hoxe ao presidente da Xunta, Alfonso Rueda, a posicionarse a favor da nova proposta de financiamento autonómico que, segundo as estimacións socialistas, suporía un incremento de 587 millóns de euros anuais para as arcas galegas.
Besteiro destacou que o novo modelo corrixe «unha inxustiza histórica» ao priorizar a poboación axustada. «Para o sistema de financiamento, Galicia contará con 205.000 habitantes máis dos que reflicte o padrón», explicou o líder socialista, sinalando que por primeira vez se recoñece o sobrecoste que supón prestar servizos básicos nun territorio marcado polo envellecemento e a dispersión.
O secretario xeral foi contundente ao preguntar se Rueda actuará como presidente de todos os galegos ou como «refén da estratexia de Feijóo en Madrid». Besteiro advertiu que a mellora de case 600 millóns é «moi relevante» para fortalecer a sanidade e a educación pública, e que rexeitala por seguidismo político sería unha irresponsabilidade.
