Logo de remontar un -11 os betanceiros levan o partido por 84-73 Felicitábase na previa desta xornada o adestrador do Ineltrón Santo Domingo porpoder contar, por vez primeira dende hai semanas coa totalidade da plantilla (ben que con Dani Martín aínda con molestias) e a verdade é que as boas sensacións acabaron trasladándose á pista. Comezou ben o Santo, situándose 7 puntos arriba á metade do 1Q, pero ben axiña o salmantinos tomaron o mando do encontro, liderados por Kourouma e Mc-Carthy Santos para rematar o cuarto cun 18-23 que anticipou o intercambio de canastras co que se chegou ao descanso (38-40). O terceiro cuarto volveu xogar, como outras veces, unha mala pasada aos betanceiros. Sempre que se vía preto a remontada, os nervios propiciaban varias perdas de balón que acabaron dándolle unha vantaxe ao rival de ata +11 que acabou cun inquietante 49-58 ao remate do período. Porén, un extraordinario 4Q, no que os betanceiros sumaron un 35-15, causou o delirio nunha bancada que ve como o equipo consegue a oitava vitoria da temporada, afiunzándose na sétima praza da liga e deixando o descenso a tres partidos de distancia.
Gran partido de Luis Portilla (20 puntos) e de Marcos Rozas (17), nun encontro en que todos aportaron, comezando por Abelleira (13) e Latas (12), autor de dúas triplas en momentos trascendentais. Así valoraba o partido José Amando Pena Soviético, o adestrador betanceiro: “Vitoria moi importante para manterse na metade da táboa con dúas primeiras partes moi igualadas, nas que non estivemos nada ben tanto en ataque como en rebote, pero cun segundo período, sobre todo o último cuarto, no que cosneguimos darlle a volta, xusto cando o ritmo de partido pasou factura a un canso Perfumerías Avenida”. Pola súa parte Miguel Latas, autor de dúas triplas claves para o despegue do Santo, falaba así do encontro: “Sabíamos que era un partido difícil e que ía ser importante o rebote. Ao principio non me notei ben, pero a medida que avanzou o partido e melloramos en defensa logrei acertar en tiros importantes. Outra vitoria moi importante logo da que logramos en Santiago a semana pasada”.
Próxima parada: sábado 7 de febreiro na sempre dificíl pista do Chantada.
