O secretario xeral do PSdeG, José Ramón Gómez Besteiro, anunciou hoxe unha iniciativa parlamentaria para que o sector do mar non quede de brazos cruzados cando o mal tempo golpea Galicia. A proposta busca que mariscadores e flota de artes menores poidan faenar en sábados, domingos e festivos de forma excepcional cando os temporais impidan o traballo nos días habituais.
Un sector ao límite: o caso da Guarda
Tras reunirse coa Confraría da Guarda, Besteiro denunciou a «situación desesperada» dos percebeiros, que perderon o 80% dos seus ingresos no que vai de ano. «Entre o 1 de xaneiro e o 20 de febreiro só puideron saír ao mar seis días. Oito de cada dez euros que deberían gañar, perdéronse polo temporal», explicou o líder socialista.
«Se Asturias e Cantabria poden, Galicia tamén»
Besteiro sinalou que esta flexibilidade xa é unha realidade nas comunidades veciñas e en Portugal. O PSdeG presentará unha Proposición non de Lei para que a Consellería do Mar active esta cláusula de excepcionalidade:
- Axilidade: A Xunta deberá resolver as solicitudes das confrarías nun prazo máximo de 72 horas.
- Vontade política: O PSdeG aclara que non fai falta reformar leis, senón modificar as ordes administrativas da Consellería.
- Sostibilidade: A medida respectará sempre os topes de captura, as tallas mínimas e os plans de explotación.
Axudas urxentes
A iniciativa tamén inclúe un plan de compensación económica urxente para aqueles profesionais que acumulen máis de 15 días de parada forzosa por causas meteorolóxicas. «O mar non entende de calendarios. Non se lle pode dicir a unha familia que non ten ingresos que non pode traballar un sábado porque o regulamento non o permite«», sentenciou Besteiro.
O mar non entende de calendarios. Non se lle pode dicir a unha familia que non ten ingresos que non pode traballar un sábado porque o regulamento non o permite», sentenciou Besteiro.
