O candidato de UCIN á Alcaldía, Diego Adrián Mallo, anunciou un dos eixos principais do seu proxecto político de cara ás eleccións municipais de 2027: converter a capital galega nun referente en benestar animal tanto en Galicia como no conxunto do Estado.
“Se son alcalde en 2027, Compostela será o concello do benestar animal dende o inicio da vida dos animais ata o seu final”, afirmou o tamén coordinador local de UCIN, quen defendeu que o trato aos animais define o nivel de civismo, modernidade e respecto dunha cidade.
Mallo denunciou que esta materia foi historicamente relegada a un segundo plano, sen planificación nin políticas ambiciosas, e apostou por situar o benestar animal no centro da acción municipal mediante un Plan Integral que mellore tanto a vida das mascotas como a convivencia cidadá.
Entre as medidas máis destacadas inclúese a creación dunha rede de parques caninos en todos os barrios, con espazos seguros, equipados e sometidos a mantemento periódico. Tamén propón avanzar cara a unha Compostela “pet friendly”, facilitando o acceso regulado de animais ao transporte público, taxis e determinados espazos municipais.
Outro dos puntos clave é a reforma do Refuxio de Bando, coa profesionalización da súa xestión, mellora da atención veterinaria e impulso de campañas de adopción, ademais de fórmulas de colaboración que garantan control público e maior eficacia.
O proxecto incorpora tamén a creación dun “Xardín da Memoria Animal” en Aríns, un espazo verde destinado ao recordo das mascotas falecidas, con zonas de paseo, elementos simbólicos e unha área específica para homenaxear aos animais que morreron sen ser adoptados.
A proposta complétase con campañas de concienciación sobre adopción responsable, esterilización e loita contra o abandono, así como accións educativas nos centros escolares.
“Unha cidade mellor tamén se constrúe así. Falar de benestar animal é falar de saúde pública, convivencia e valores”, concluíu Mallo.
UCIN Santiago avanzou que continuará presentando nas próximas semanas novas propostas sectoriais dentro dun programa centrado na mellora da calidade de vida da cidadanía.
