Nun acto organizado pola Fundación Luis Tilve, o autor afondará na súa última investigación sobre a Guerra Civil e a España de posguerra a través das vivencias e a perspectiva do diplomático e militar británico Wing Commander James.
O catedrático de Historia Emilio Grandío plasmou a súa última investigación sobre a Guerra Civil e a España de posguerra nun libro titulado ‘Un tory en España. Wing Commander James (1936-1941)’. O ensaio, no que Grandío amosa unha nova visión deste período histórico a través das vivencias e a perspectiva do diplomático e militar británico Archibald James, será presentado polo autor nun acto organizado pola Fundación Luis Tilve e a editorial Catarata e que terá lugar este xoves 21 de maio na Casa das Campás a partir das 19:30 horas.
Grazas á consulta de fondos diplomáticos, e en especial da documentación privada e inédita do comandante James facilitada pola súa familia, a obra reconstrúe un período no que España se converteu nun escenario clave da política europea, onde as decisións de países como o Reino Unido marcaron o noso futuro e o da nova orde internacional. James foi un gran coñecedor deste país, que visitou asiduamente naqueles críticos momentos, chegando a ser primeiro secretario da Embaixada británica en 1940.
O libro de Grandío permite afondar, mediante a intervención de personaxes que van interactuando co diplomático británico, como Churchill, De Gaulle, Pétain ou o propio Franco, nos feitos que condicionaron a nosa historia recente, achando tamén certas ‘rimas’ co noso presente actual.
Catedrático de Historia Contemporánea pola USC, Emilio Grandío é actualmente coordinador da Rede Española de Estudos Históricos de Intelixencia (Reshint), o que o levou a publicar nos últimos anos outros traballos como ‘A España espiada: Redes de intelixencia durante a Segunda Guerra Mundial’ ou ‘Hora Zero. A intelixencia británica en España durante a Segunda Guerra Mundial’. Foi coordinador do proxecto interuniversitario ‘As vítimas, os nomes, as voces e os lugares’, e da iniciativa europea sobre ‘A cultura do fascismo/antifascismo na construción de procesos de transición democrática’, ademais de autor de numerosos traballos sobre os períodos da II República, a Guerra Civil, a Ditadura e a Transición.
O novo ensaio do doutor Grandío será presentado polo director da Fundación Luis Tilve e secretario de Organización da Agrupación Socialista de Pontevedra, Guillerme ‘Yeyo’ Pérez Agulla.
