O concelleiro de Fisterra, Francisco Martínez Traba denuncia publicamente o que considera unha gravísima instrumentalización política do Concello de Fisterra por parte da entón alcaldesa, Áurea Domínguez Sisto, nun intento de desacreditalo persoal e politicamente nun dos momentos de maior tensión institucional vividos no municipio.
Segundo expón o edil fisterrán, o que no seu día se intentou trasladar á opinión pública como un suposto escándalo urbanístico contra a súa persoa queda hoxe plenamente desmontado á vista da documentación coñecida e da resolución emitida pola Axencia de Protección da Legalidade Urbanística (APLU).
Martínez Traba lembra que, en pleno contexto da moción de censura promovida ante a gravísima situación institucional, administrativa e política que atravesaba o Concello de Fisterra —e que, lamentablemente, ao seu xuízo continúa atravesando—, marcada por múltiples irregularidades e ilegalidades administrativas, Áurea Domínguez Sisto decidiu activar desde a propia institución municipal unha denuncia contra el, utilizando para iso recursos públicos, medios municipais e a propia estrutura administrativa do Concello.
“O feito de utilizar unha institución pública para intentar atacar politicamente a quen estaba denunciando corrupción administrativa e esixindo responsabilidades constitúe, ao meu xuízo, un feito dunha enorme gravidade política e institucional”, subliña o concelleiro.
Francisco Martínez Traba engade que a denuncia remitida á APLU non xurdiu de maneira espontánea nin improvisada, senón que foi formalmente elaborada no ámbito municipal por un arquitecto que naquel momento estaba prestando servizos para o Concello de Fisterra.
Neste sentido, o edil considera especialmente grave que ese profesional estivese desempeñando funcións no Concello nun contexto que cualifica de profundamente irregular, ao ter sido incorporado pola propia Áurea Domínguez Sisto nunha situación amplamente cuestionada pola súa falta de encaixe legal.
“É dicir, impulsouse unha denuncia institucional por supostas irregularidades urbanísticas utilizando a propia estrutura municipal e coa intervención dun técnico cuxa vinculación co Concello xa estaba rodeada de enorme controversia”, matiza.
Francisco Martínez Traba lembra tamén que tivo coñecemento da existencia desta denuncia non a través dunha comunicación institucional directa, senón pola súa difusión pública nos medios de comunicación, circunstancia que considera especialmente grave dada a natureza do asunto e o uso dunha institución pública neste contexto.
Segundo expón, tras ter coñecemento da denuncia, foi el mesmo quen se puxo directamente en contacto coa Axencia de Protección da Legalidade Urbanística para poñerse á súa total disposición, facilitar o acceso á propiedade e convidar expresamente aos técnicos a realizar cantas inspeccións considerasen oportunas.
“Fun eu persoalmente quen contactou coa APLU para indicarlles que podían acceder á parcela cando estimasen oportuno, que se lles abrirían as portas e que poderían comprobar absolutamente todo o que considerasen necesario. Así foi como finalmente se levou a cabo a inspección”, subliña.
Francisco Martínez Traba subliña que, lonxe de poñer impedimento ningún, foi el mesmo quen facilitou expresamente o acceso á propiedade para que a Axencia puidese realizar cantas comprobacións considerase oportunas.
O concelleiro considera ademais especialmente grave que esta actuación non se limitase á mera presentación dunha denuncia institucional, senón que fose acompañada dunha evidente exposición pública e mediática da situación.
Segundo expón Martínez Traba, a denuncia non só foi impulsada utilizando o propio Concello de Fisterra, senón que ademais foi trasladada aos medios de comunicación, incorporando referencias, información e imaxes vinculadas ás súas propiedades e parcelas privadas.
“Non estamos falando simplemente dunha denuncia administrativa. Estamos falando da utilización dunha institución pública para promover unha exposición pública e mediática de carácter persoal e político, sinalando propiedades privadas co evidente propósito de construír un relato de desgaste e desprestixio”, sostén.
Ao seu xuízo, esta forma de proceder resulta extraordinariamente grave e incompatible cun uso rigoroso e institucional dos recursos públicos.
Tal e como lembra, xa se fixo público no seu momento que a finais de xullo se producirían advertencias e ameazas políticas relacionadas con este mesmo asunto e coa moción de censura que se estaba xestando, atribuídas ao presidente de Alternativa dos Veciños, Ángel García Seoane.
“Cada quen poderá extraer as súas propias conclusións, pero o encadeamento dos feitos resulta, cando menos, moi revelador”, apunta.
Segundo expón o concelleiro, foi o propio Concello de Fisterra quen promoveu esta actuación por decisión e baixo o impulso directo da entón alcaldesa Áurea Domínguez Sisto, co respaldo político do presidente da súa formación, Ángel García Seoane, nun intento evidente de desacreditalo e desgastalo politicamente precisamente por ser quen estaba denunciando con firmeza a corrupción administrativa, as múltiples irregularidades existentes e a profunda degradación institucional do Concello de Fisterra, defendendo a legalidade, a honradez, a transparencia e a necesaria rexeneración da administración pública local.
Martínez Traba considera que, mentres os veciños de Fisterra asistían —e continúan asistindo— con preocupación á deterioración institucional do Concello, a prioridade política de quen gobernaban semellaba ser utilizar unha institución pública como ferramenta de confrontación política persoal.
Pero, segundo engade, existe un elemento adicional que converte este episodio nun exercicio de monumental hipocrisía política.
Resulta profundamente irrisorio, afirma, que Áurea Domínguez Sisto pretendese dar leccións de legalidade urbanística e sinalalo publicamente por presuntas irregularidades cando a veciñanza coñece perfectamente as importantes controversias urbanísticas vinculadas ao seu entorno familiar.
O concelleiro fai referencia, neste sentido, a unha gran nave situada nunha parcela de carácter agrario en Sardiñeiro, ao fondo da rúa Lagares, próxima aos 300 metros cadrados, vinculada ao entorno familiar de Áurea Domínguez Sisto e situada en pleno entorno forestal.
Do mesmo xeito, tamén menciona o caso de quen daquela era concelleiro de Obras e Urbanismo no goberno da señora Áurea Domínguez Sisto, Francisco Antonio Lestón Redonda, respecto do que, segundo lembra Francisco Martínez Traba, no seu momento foron presentadas denuncias no Concello por parte de veciños da zona de Sardiñeiro pola presunta alteración do cauce do río ao seu paso por unha parcela da súa propiedade, onde se sitúa a súa vivenda familiar, actuación que lle tería permitido gañar superficie de terreo e proceder ao peche da finca invadindo a correspondente zona de servidume.
E, no que respecta a Ángel García Seoane, Martínez Traba lembra antecedentes públicos sobradamente coñecidos nos que mesmo tivo que afrontar no ano 2010 o derrubo parcial da súa propia vivenda por afectar dominio público marítimo-terrestre.
“Pero o máis escandaloso é que, con posterioridade, os custos derivados daquela actuación acabarían asumidos polo propio Concello que el presidía, atribuíndo a situación a un suposto erro urbanístico municipal”, sostén.
“E se a señora Áurea Domínguez Sisto considera oportuno abrir un debate público sobre legalidade urbanística, irregularidades construtivas e respecto á normativa, non teremos ningún inconveniente en afondar noutras actuacións e construcións que tamén merecerían explicacións públicas ante a cidadanía”, advirte.
Francisco Martínez Traba lembra ademais que a candidatura coa que se concorreu en Fisterra presentouse publicamente cun compromiso claro ante a veciñanza: poñer fin ás graves irregularidades, ilegalidades e á degradación institucional que durante décadas viñan lastrando o Concello.
“Eu mantiven intacto ese compromiso coa cidadanía e coa defensa da legalidade, da transparencia e da honradez na administración pública. Outros, lamentablemente, decidiron abandonar ese camiño e situarse politicamente xusto ao lado daqueles que representan precisamente aquilo que se dicía combater”, sinala.
Por todo iso, o concelleiro considera aínda máis indignante que precisamente estas persoas pretendesen construír artificialmente unha polémica urbanística contra quen estaba denunciando corrupción administrativa e esixindo responsabilidades políticas.
Porén, subliña que o tempo e os feitos acabaron poñendo cada cousa no seu lugar.
A resolución emitida pola APLU, lembra, non derivou en ningunha actuación de reposición da legalidade urbanística nin en medida algunha sobre o núcleo principal das edificacións denunciadas.
“É dicir, todo aquel intento de construír un relato político contra a miña persoa rematou sen o resultado que pretendían facer crer á cidadanía”, afirma.
“O verdadeiramente grave non é só o fracaso daquela operación política. O realmente grave é que Áurea Domínguez Sisto utilizase o Concello de Fisterra, unha institución que pertence a todos os veciños, para intentar atacar politicamente a quen fiscaliza, denuncia irregularidades e esixe responsabilidades”, conclúe.
Martínez Traba remata defendendo que as institucións públicas están para servir ao interese xeral, non para seren utilizadas como ferramentas de desgaste político ou persoal, e reivindica que Fisterra “merece respecto institucional, transparencia, honradez e que a veciñanza coñeza toda a verdade”.
