O 10º Congreso Provincial de Novas Xeracións (NNXX) de Pontevedra culminou hoxe coa elección por unanimidade de Raúl Santamaría como novo presidente. O deputado vilagarcián toma o relevo nun acto marcado pola chamada á acción política dos mozos de cara ás próximas citas electorais.
O PPdeG, referente entre a mocidade
Durante a clausura, a secretaria xeral do PPdeG, Paula Prado, subliñou a fortaleza dos populares entre o electorado novo. “Somos a primeira opción dos menores de 30 anos; nas pasadas autonómicas, 4 de cada 10 mozos galegos elixiron a nosa papeleta”, afirmou.
Prado contrapuxo este apoio á actitude da oposición, criticando a «conflitividade» do BNG e a xestión do PSOE. A dirixente popular destacou que o Goberno de Alfonso Rueda traballa en eixes fundamentais como o acceso á vivenda —fronte a unha lei estatal que cualificou de «errática»— e reafirmou a súa solidariedade cos estudantes afectados polos erros na recente convocatoria da PAU, esixindo solucións inmediatas para que os mozos «non paguen os erros alleos».
Unha axenda «marcada pola mocidade»
Pola súa banda, o presidente provincial do PP de Pontevedra, Luis López, cualificou o congreso de «revitalizador» e agradeceu o labor da presidenta saínte, Ana Cristina Pérez Cabaleiro. López foi contundente ao marcar a folla de ruta para 2027: “O noso programa para as municipais será o que conte con máis políticas xuvenís da historia”.
O presidente provincial insistiu en que NNXX non será un espectador, senón que terá un «papel fundamental e protagonista». Segundo López, a organización representa a unha mocidade que «se rebela contra o pensamento único» e que aposta polo modelo de éxito da Xunta en FP e matrícula universitaria gratuíta.
Nova etapa: «Somos presente»
Nova etapa: «Somos presente»Raúl Santamaría asume o cargo coa mirada posta en consolidar as institucións gobernadas polo PP e facilitar a chegada de Feijóo á Moncloa. Acompañado polo estradense Iago Cribeiro como vicepresidente e Sonia Baqueiro como secretaria xeral, Santamaría reivindicou o papel da súa xeración: “Xa somos presente; esa é a visión que debemos manter para construír o futuro”.
O novo presidente, que tivo un recordo emotivo para o falecido Pablo Carollo e para a súa antecesora no cargo, concluíu remarcando que NNXX se mantén como a organización xuvenil con maior representatividade de Galicia, lista agora para afrontar os retos electorais que se aveciñan.
