A Federación pola Igualdade das Mulleres da Provincia de Pontevedra (FEMUPO) impulsa o proxecto “Mulleres FEMUPO, mulleres que fan Camiño”, unha proposta cultural, educativa e social orientada a achegar á cidadanía o talento, o liderado e o compromiso das mulleres galegas.
A iniciativa, financiada pola Xunta de Galicia a través do programa O Teu Xacobeo, percorrerá dez municipios pontevedreses vinculados ao Camiño Portugués e ao Camiño Portugués pola Costa. O seu obxectivo é divulgar as traxectorias das profesionais e entidades galardoadas nas cinco edicións dos Premios Mulleres FEMUPO (2022-2026), pertencentes a sectores como a cultura, o deporte, a empresa, a administración e o asociacionismo.
«Cada paso que damos xuntas constrúe un camiño máis igualitario», salienta Raquel Touriño, presidenta de FEMUPO.
Unha semana de actividade en cada municipio
O programa despregarase en cada concello durante unha semana e combinará tres eixes fundamentais:
- Exposición itinerante: Un percorrido visual polas historias das premiadas.
- Obradoiros participativos: Celebraranse un total de 20 talleres (dous por concello) deseñados con metodoloxías accesibles e dinámicas.
- Contidos audiovisuais: Acceso a través de códigos QR para afondar nas traxectorias das protagonistas.
As actividades estarán abertas ao público xeral, cun foco especial na mocidade, persoas maiores e colectivos en situación de vulnerabilidade. Para iso, FEMUPO traballará en liña directa con centros educativos, entidades sociais e asociacións locais.
Conectar ás referentas co territorio
Máis alá de difundir os perfís das galardoadas —algunhas das cales participarán persoalmente nas sesións—, un dos puntos fortes dos talleres será a identificación de referentas locais en cada municipio. Deste xeito, procúrase que a veñanza recoñeza o talento feminino da súa contorna máis próxima e debata sobre a igualdade de oportunidades, a superación de estereotipos e a participación da muller no desenvolvemento do territorio.
Co lema de «facer camiño» como metáfora do esforzo e da apertura de novas posibilidades para as vindeiras xeracións, FEMUPO transforma o recoñecemento institucional nunha experiencia viva, aberta e conectada cos valores xacobeos.
