Tivo lugar o sorteo da primeira eliminatoria da Copa feminina. O Celta é o único equipo galego que participou no sorteo no que se estableceron os duelos en razón de proximidade. O seu rival será o Avilés e o único partido terá lugar en feudo celeste.
O sorteo copeiro da primeira eliminatoria estaba condicionado pola proximidade xeográfica dos equipos. Por esa razón as eliminatorias estiveron programadas en oito bloques para compoñer as dezaseis eliminatorias. No último deles estaba o único cadro galego nesta parte da competición e os tres asturianos.
A bola que contiña no seu interior o nome do Celta foi a primeira en saír desa derradeira parte do evento, o que lle garantía estrearse na competición ao abeiro dos seus seareiros. O seu rival foi o Avilés, un equipo inicialmente descendido a Terceira Federación no remate da pasada liga, pero reintegrado á Segunda logo da desaparición do At. Madrid C para cubrir esa praza. Para iso valeulle ser o conxunto con maior número de puntos entre os nove descendidos desa categoría.
O partido terá lugar entre os días 8 e 10 do próximo mes de setembro.
Curiosamente, o Avilés, e tamén en Vigo, será o rival do cadro que dirixe David Ferreiro na primeira xornada de liga.
De pasar dúas eliminatorias, o Celta podería ter como rival ao Deportivo, que ao ficar máis abaixo do oitavo lugar da Primeira División 2025/26 entrará na competición na Terceira Eliminatoria. Nese caso sería a primeira vez na historia moderna do fútbol feminino na que se encontraran os primeiros equipos das dúas entidades máis poderosas do fútbol galego.
Foto: Sorteo da Primeira Eliminatoria. © RFEF
