Lugo acollerá o domingo 13 de setembro unha exhibición de partidas simultáneas co gran mestre Aleksa Strikovic e o II Torneo Xadrez no Camiño – O Teu Xacobeo. A xornada, organizada pola Escola Luguesa de Xadrez e aberta á cidadanía, desenvolverase no edificio multiúsos da Xunta de Galicia, na Ronda da Muralla.
A iniciativa forma parte do proxecto Xadrez no Camiño – O Teu Xacobeo e conta co cofinanciamento da Xunta de Galicia, da Deputación de Lugo, do Concello de Lugo e da Escola Luguesa de Xadrez.
Exhibición de simultáneas co gran mestre Aleksa Strikovic
A exhibición comezará ás 12.00 horas na explanada do edificio, onde o gran mestre serbio Aleksa Strikovic se enfrontará simultaneamente a 15 xogadores. A participación será gratuíta e as inscricións poderán formalizarse no enderezo electrónico escolaluguesaxadrez@gmail.com.
Strikovic, gran mestre desde 1996, compite baixo a federación de Serbia e figura entre os xogadores de referencia internacional. Se as condicións meteorolóxicas impiden desenvolver a actividade no exterior, a exhibición trasladarase ao vestíbulo do edificio da Xunta de Galicia.
II Torneo Xadrez no Camiño – O Teu Xacobeo
A partir das 16.30 horas disputarase o II Torneo Xadrez no Camiño – O Teu Xacobeo, unha competición de xadrez rápido a nove roldas. Cada participante disporá de tres minutos por partida, cun incremento de cinco segundos por xogada. A inscrición terá un custo de cinco euros e o torneo, aberto a toda a cidadanía, concederá premios ás tres primeiras persoas clasificadas. A organización confirmou tamén a participación do gran mestre Aleksa Strikovic.
