O portavoz do Grupo Municipal Socialista no Concello de Lugo, Miguel Fernández, acusou este venres á Xunta de Galicia de «incumprir o compromiso público» adquirido coa cidade ao renunciar a asumir a totalidade dos terreos do antigo colexio do Sagrado Corazón. Según denunciou, a administración autonómica pretende limitar a súa actuación á superficie imprescindible para o centro de saúde, desaproveitando a única gran parcela dotacional do barrio.
Fernández lembrou que no encontro mantido en maio de 2025 co conselleiro de Sanidade, Antonio Gómez Caamaño, a Xunta amosou a súa disposición a asumir a titularidade conxunta dos terreos e parte dos custos de demolición para replicar o modelo de servizos públicos desenvolvido no antigo hospital da Residencia.
«O Sagrado Corazón necesita o centro de saúde polo que tanto loitamos, pero precisa tamén unha escola infantil, un centro sociocultural e un centro de día. Unha alcaldesa debe defender a cidade; Candia está sendo cómplice dun engaño da Xunta», aseveró Miguel Fernández.
Planificación a longo prazo para unha poboación envellecida e en crecemento
Desde o grupo socialista advirten de que a decisión da Xunta supón «perder unha oportunidade de ouro» para planificar os servizos sociais e sanitarios das vindeiras décadas. O Sagrado Corazón presenta unha dualidade demográfica singular: unha poboación actual moi envellecida que require atención asistencial de proximidade e, simultaneamente, un elevado potencial de desenvolvemento residencial.
Así mesmo, Fernández defendeu que o proxecto debe contemplar a posibilidade de rehabilitar as edificacións existentes se presentan condicións adecuadas, en lugar de optar directamente por unha demolición total sen un plan global.
Críticas á actitude de Elena Candia
O portavoz do PSOE cualificou de «obvia e preocupante» a actitude da alcaldesa, Elena Candia, á que acusa de actuar como «subordinada» do Executivo galego en lugar de esixir o cumprimento dos acordos institucionais.
O PSOE instou tanto ao Gobierno autonómico como ao municipal a rectificar de inmediato, aclarar a súa folla de ruta para o espazo e presentar un proxecto estruturado e de carácter supramunicipal para o conxunto do barrio.
