Último partido de Fase de Grupos na Copa Galicia para o Ineltrón Santo Domingo Betanzos. Pese ás dúas derrotas sufridas, o equipo betanceiro aínda pode “salvar” á pretemporada e quedar segundo de grupo. Para iso debe gañar o seu rival deste domingo (Ucoga Seguros Chantada) por 10 ou máis puntos e que Culleredo perda con Xiria. Porén, este segundo posto só sería testemuñal pois as bases de competición da Copa non contemplan semifinais, xogando o título os primeiros clasificados de cada grupo que sairán, en concreto, dos resultados entre Xiria e Culleredo (se Culleredo gaña por máis de 3 puntos pero por non máis de 8, e Chantada gaña ao Santo, mesmo pode clasificarse o equipo lucense) e Marín, que venceu a Novobasket en partido entre semana.
O UCOGA Seguros Chantada, o rival dos betanceiros, é todo un clásico na categoría que vén de remodelar practicamente a totalidade da súa plantilla con obxecto de volver competir no máis alto da liga. Así valora o encontro José Amando Pena “Soviético”, adestrador dos locais: “No partido contra Chantada teremos a oportunidade de seguir probando e afinando o adestrado ata o momento. Nos tres partidos de pretemporada fixemos moitas cousas ben, pero temos que ser consistentes durante os catro cuartos. Espero que o domingo o equipo suba un punto a intensidade tanto en ataque como en defensa”.
A cita, en horario e lugar de costume: domingo, 17h, pavillón José María Valeiro Iglesias “Tocayo”.
Completa axenda de canteira
Polo demais, a temporada segue poñéndose en marcha. Xunto aos equipos que xa iniciaron competición (o J. Caamaño Arquitecto viaxa a Teo para medirse a Galogrín, o Warnier Informática á Coruña para xogar contra Calasanz, o júnior masculino visita a pista do Esclavas e o feminino a do Baxi Ferrol), o equipo sénior de Segunda División xoga un amigable contra Basket School Ferrol ao remate da cita do conxunto de 3ª FEB
