O Concello de Lugo iniciou os traballos para recuperar a emblemática fonte da Praza do Rei, situada nunha das principais entradas á cidade e que levaba case un ano sen funcionar e co vaso baleiro.
A instalación, inaugurada en 1991, permanecía fóra de servizo desde novembro de 2025. Co fin de solucionar esta situación, o Goberno municipal acomete agora as obras necesarias para arranxar as filtracións de auga que afectaban á zona das bombas e aos cadros eléctricos.
A intervención conta cun investimento de 13.310 euros e céntrase na reparación e impermeabilización integral do vaso. Os traballos inclúen a retirada da lámina deteriorada nas inmediacións da bomba e da baixada, a preparación do soporte, o selado de gretas e o tratamento específico dos elementos pasantes, impulsores e desaugadoiros por considerarse puntos críticos.
Unha vez finalizadas estas tarefas de acondicionamento, procederase á posta a punto do sistema eléctrico e hidráulico para garantir o seu correcto funcionamento.
Esta actuación forma parte do plan continuo de conservación e mellora dos espazos públicos impulsado polo Concello de Lugo. A posta en marcha da fonte permitirá revitalizar un elemento moi visible para quen accede á cidade desde a Avenida de Madrid, mellorando a imaxe urbana nunha das súas arterias de entrada máis concorridas.
