Rueda pide “esforzos renovados” aos populares coruñeses para liderar dende Galicia o cambio en España con Feijóo

O presidente do PPdeG, Alfonso Rueda, subliñou hoxe que Galicia debe converterse en “peza fundamental e motor do cambio en España” para garantir a vitoria de Alberto Núñez Feijóo nas Eleccións Xerais do próximo 29 de novembro. Durante a Xunta Directiva Provincial do PP da Coruña, e arroupado polo presidente provincial, Diego Calvo, e a secretaria xeral, Paula Prado, Rueda fixo un chamamento aos populares coruñeses a intensificar o traballo e a “non dar ningunha batalla por vencida”.

O líder dos populares galegos contrastou o modelo de estabilidade, moderación e xestión rigorosa do Goberno autonómico fronte aos oito anos de “caos e corrupción” do Executivo central. A este respecto, achacou a convocatoria electoral á desesperación de Pedro Sánchez tras fracasar co seu intento de “tapar con dous decretos trapalleiros a inacción en vivenda” e á incapacidade de presentar uns Orzamentos Xerais do Estado, mantendo as contas prorrogadas desde 2023.

O modelo galego fronte aos “obstáculos”

Rueda puxo en valor os logros da Xunta como exemplo dunha política útil centrada no benestar da cidadanía:

• Vivenda: Con máis de 4.000 vivendas en construción en toda a comunidade —máis de 1.000 de promoción pública na Coruña—, mentres cualificou de “auténtico fracaso” as medidas impostas nas zonas tensionadas.
• Economía e Orzamentación: Destacou a aprobación puntual e anual dos orzamentos galegos e a chegada de grandes proxectos estratéxicos como o xigante automobilístico SAIC, que marcará “un antes e un despois” na provincia.
• Alternativa política: Censurou a postura de PSdeG e BNG, aos que definiu como os “do NON”, por secundar e replicar o modelo estatal en cidades como A Coruña e Santiago de Compostela.

Diego Calvo: “Non podemos fallar”

Pola súa banda, o presidente provincial do PP da Coruña, Diego Calvo, cualificou a cita do 29N como un momento transcendental no que os españois decidirán o seu futuro para os vindeiros catro anos. “O obxectivo é gañar con claridade”, afirmou, convencido de que a provincia responderá para poñer fin a un Goberno central marcado pola confrontación e a parálise.

Para rematar, Calvo lembrou que estas xerais constitúen o trampolín perfecto para preparar as vindeiras eleccións municipais de maio, polo que exixiu aos alcaldes e voceiros do partido “máis traballo, unidade e confianza ca nunca”. Calvo fixo»unha chamada á movilización interna do Partido Popular na provincia da Coruña para consolidar a alternativa galega e impulsala cara a un cambio político a nivel estatal».