Miguel Piqueras, coordinador UCIN Boiro, manifesta o seu apoio á reclamación que a Asociación de Juristas Animalistas (ADJA) presentou o pasado 14 de outubro de 2026 ante a Comisión da Transparencia de Galicia contra o Concello de Boiro, e solicita formalmente a dimisión da concelleira de Medio Ambiente.
Segundo o escrito de ADJA, o 4 de maio rexistrouse unha solicitude de acceso á información pública sobre a xestión das colonias felinas no municipio: censo e rexistro, programa municipal e método CER (Captura, Esterilización e Retorno), orzamentos destinados a esterilización, desparasitación e atención veterinaria, convenios con clínicas e entidades protectoras, e formación e carnés das persoas coidadoras, entre outros extremos. Con todo, pasaron máis de cinco meses sen obter ningunha resposta por parte do goberno local.
No seu escrito, ADJA cita dúas resolucións recentes da propia Comisión da Transparencia —do 26 de maio de 2026— que xa deron a razón aos solicitantes en casos semellantes sobre colonias felinas nos concellos veciños de Porto do Son (089/26) e Chantada (075/26).
«Os veciños teñen dereito a saber como se empregan os recursos públicos. A transparencia non é unha concesión do goberno local, é unha obriga legal« Miguel Piqueras.
Unha proposta xa sobre a mesa desde decembro de 2025
UCIN Boiro lembra que xa en decembro de 2025, antes de que ADJA rexistrase a súa solicitude, presentou unha proposta concreta para solucionar este problema: un plan integral de protección felina que incluía casetas-refuxio seguras e dignas en todas as zonas con colonias (comezando pola Praza da Mancomunidade), mantemento periódico das estruturas, apoio efectivo ao método CER, coordinación coas persoas voluntarias e entrega dos carnés oficiais ás persoas alimentadoras. A Lei 7/2023 de benestar animal impón obrigas específicas aos concellos nesta materia que a administración local está a incumprir.
Ante a falta de planificación e de resposta municipal —unha situación que UCIN xa denunciou no seu momento—, o grupo considera que a concelleira de Medio Ambiente, como máxima responsábel da área, debe asumir as consecuencias políticas e dimitir dos seus cargos. «Non é aceptable que o Concello non responda a quen lle pide documentos e cifras sobre o benestar animal. Alguén ten que dar a cara«, engade Piqueras. Desde a formación política aclaran que esta petición de dimisión é unha postura propia de UCIN Boiro e non vincula á asociación ADJA.
Para rematar, UCIN Boiro esixe ao goberno local que responda de inmediato á solicitude de ADJA, que publique os datos reclamados e que poña en marcha sen máis demora as medidas necesarias. O partido reitera tamén o seu recoñecemento e colaboración coas persoas voluntarias que levan anos realizando de forma desinteresada un labor que lle corresponde estritamente ao Concello.
