Os órganos xudiciais galegos especializados en violencia sobre a muller rexistraron durante o segundo trimestre deste ano 2.222 denuncias e atenderon a un total de 1.946 vítimas, cifras que reflicten un aumento do 8,3% e do 4,5%, respectivamente, en relación co mesmo período de 2025. Seis de cada cen mulleres que aparecen nas denuncias como vítimas deste tipo de delitos (o 11,44 %) acolléronse a dispensa do deber de prestar declaración.
A gran maioría das denuncias, 1.721, foron presentadas polas propias vítimas, ben nos xulgados ou en dependencias policiais, mentres que no período estudado os familiares interpuxeron 31. Ademais, contabilizáronse 320 denuncias derivadas directamente de atestados policiais; 90, orixinadas por partes de lesións; e 60, presentadas por terceiras persoas alleas á contorna familiar da vítima.
Na comunidade, a taxa de vítimas denunciantes de violencia de xénero por cada 10.000 mulleres foi de 13,8, a terceira máis baixa do Estado, cuxa media se situou en 20, segundo os datos elaborados pola Sección de Estatística para o Observatorio contra a Violencia Doméstica e de Xénero, que se fixeron públicos hoxe.
Por outra banda, o informe reflicte que o 93,37 % das sentenzas ditadas polas Seccións de Violencia sobre a Muller entre abril e xuño en procesos de violencia de xénero foron condenatorias.
Ordes de protección solicitadas e concedidas
As ordes de protección, tanto as solicitadas como as acordadas, diminuíron durante o segundo trimestre de 2026, en comparanza co mesmo período de 2025. Así, as Seccións de Violencia sobre a Muller dos Tribunais de Instancia recibiron 413 peticións, un 9,6 % menos que un ano antes, e adoptaron 274 ordes e medidas de protección, un 12,2 % menos.
Medidas xudiciais penais e civís de protección
Por outra banda, os órganos xudiciais ditaron 128 medidas cautelares civís, cuxa finalidade é a protección da muller e dos menores en tanto se resolve o proceso penal. As máis frecuentes foron as relacionadas coa prestación de alimentos (38). Ademais, adoptaron 27 sobre suspensión do réxime de visitas; 24, relativas á atribución da vivenda; e 20, sobre suspensión da garda e custodia.
No período analizado, os tribunais impuxeron 551 medidas de protección de carácter penal, sendo as máis frecuentes a prohibición de comunicación (233) e a orde de afastamento (226).
Nova competencia en materia de violencia sexual
En materia de violencia sexual (fóra do ámbito da parella ou exparella), as Seccións de Violencia sobre a Muller dos Tribunais de Instancia recibiron durante o segundo trimestre de 2026 un total de 214 denuncias e rexistraron 215 mulleres vítimas.
Estes órganos xudiciais asumiron a competencia nesta materia o 3 de outubro de 2025, tal e como establece a Lei Orgánica 1/2025, do 2 de xaneiro, de medidas en materia de eficiencia do Servizo Público de Xustiza.
O número de delitos instruídos ascendeu a 250, sendo os máis frecuentes os delitos contra a liberdade e indemnidade sexuais cometidos fóra do ámbito da parella ou exparella, que sumaron 247. Séguenlles o delito de acoso con connotación sexual (2) e trata co fin de explotación sexual (1).
No segundo trimestre recibíronse 25 solicitudes de orde de protección, das que se acordaron 21.
