A iniciativa, anunciada por Guido Guía en redes sociais, propón percorrer en tres días os últimos 100 quilómetros da ruta xacobea, do 1 ao 3 de xaneiro, sen necesidade de inscrición previa e aberta a todas as persoas que queiran sumarse.
Guido Guía propón comezar o ano santo 2027 dunha maneira diferente: percorrendo o Camiño Primitivo dende Lugo ata Santiago de Compostela. A iniciativa, de carácter espontáneo e aberta á participación de todas as persoas interesadas, desenvolverase entre o venres 1 e o domingo 3 de xaneiro, seguindo os pasos do rei Afonso II O Casto, considerado o primeiro peregrino a Compostela.
O obxectivo é completar en tres etapas os últimos 100 quilómetros desta histórica ruta xacobea, compartindo a experiencia da peregrinación nun ambiente aberto e sen formalidades. A proposta de Guido Guía non require inscrición previa: abonda con ter ganas de camiñar e sumarse ao grupo para vivir esta aventura colectiva.
O percorrido comezará o venres 1 de xaneiro en Lugo, con saída ás 11.00 horas desde a Praza do Camiño Primitivo, con destino a Ponte Ferreira. A segunda etapa terá lugar o sábado 2 de xaneiro, cando o grupo partirá ás 8.00 horas desde a ponte medieval de Ferreira para chegar a Arzúa. A última xornada será o domingo 3 de xaneiro, con saída ás 7.00 horas desde a Praza de Galicia de Arzúa para completar o camiño ata Santiago de Compostela.
Con esta proposta, Guido Guía convida a veciñanza e a todas as persoas amantes do Camiño a iniciar o ano compartindo quilómetros, descubrindo o patrimonio e a historia da ruta primitiva e vivindo a experiencia de chegar a Compostela en grupo.
As persoas interesadas en participar poden contactar con Guido Guía a través das súas redes sociais ou escribir ao correo electrónico guidoguiaturismo@gmail.com para recibir o acceso ao grupo de WhatsApp, onde se coordinará a aventura.
Tres etapas, un mesmo destino e unha invitación aberta a comezar 2027 camiñando dende Lugo ata Santiago. Guido Guía pon en marcha o plan; quen queira, pode sumarse.
