A programación aborda cuestións como o consumo de alcohol, tabaco e cannabis, as apostas, os videoxogos e as redes sociais, con actividades adaptadas a cada idade.
O Concello de Lugo, a través do Servizo Municipal de Prevención de Drogodependencias e outras Adiccións Comportamentais, dependente da Concellería de Xuventude e Deportes, pon en marcha unha nova edición dos obradoiros de prevención dirixidos ao alumnado dos centros educativos e ás familias.
O obxectivo desta programación é ofrecer á mocidade algo máis que información sobre os consumos e as adiccións: proporcionarlles coñecementos, criterio e habilidades que lles permitan tomar decisións de maneira autónoma e segura. Para iso, abórdanse cuestións como a presión do grupo, o uso das redes sociais e dos videoxogos, as apostas, os teléfonos móbiles e o consumo de substancias adictivas. «Non se trata só de dicirlles aos mozos e mozas o que non deben facer, senón de ofrecerlles ferramentas para pensar, decidir, resolver conflitos, afrontar a presión do grupo e desenvolverse na sociedade actual».
Formación adaptada a cada idade
Os obradoiros desenvolveranse entre novembro de 2026 e xuño de 2027 e estarán adaptados ás diferentes etapas educativas, tendo en conta a idade e as necesidades de cada grupo.
No caso de 5º e 6º de Primaria, desenvolverase o programa «Prevención de adiccións con e sen substancia. Desconecta», que aborda cuestións como o alcohol, o tabaco, os videoxogos, as apostas e as redes sociais. Tamén se traballarán a presión do grupo, a toma de decisións e a resolución de conflitos.
Para o alumnado de 1º e 2º da ESO, o programa Unplugged, baseado na evidencia científica e dirixido a mozos e mozas de entre 12 e 14 anos, céntrase no desenvolvemento de habilidades para a vida, na información sobre as adiccións e na influencia do contorno social.
En 3º da ESO, as sesións abordarán o consumo de cannabis, os vapeadores e outros produtos do tabaco, facendo especial fincapé nos mitos e nos riscos asociados a estas prácticas.
Como novidade, o alumnado de 4º da ESO contará con dúas sesións por grupo centradas nas adiccións do século XXI. Nelas traballaranse a responsabilidade persoal, a comunicación, as habilidades sociais e emocionais, a resolución de conflitos e o pensamento crítico.
As actividades serán impartidas por profesionais cualificados dos ámbitos socioeducativo e da psicoloxía, mediante unha metodoloxía dinámica e práctica que fomenta a reflexión e a participación do alumnado.
As familias, parte fundamental da prevención
A programación inclúe tamén sesións específicas para as familias, co obxectivo de facilitarlles información e ferramentas para acompañar os seus fillos e fillas na prevención das adiccións.
Nestes encontros trataranse cuestións relacionadas coa prevención no ámbito familiar, as adiccións tecnolóxicas e comportamentais, as substancias psicoactivas, as apostas, as redes sociais e o uso dos teléfonos móbiles, entre outros aspectos.
As actividades organizaranse en función das solicitudes recibidas, dando prioridade aos grupos xa constituídos, como centros educativos, asociacións ou grupos de nais e pais, e poderán desenvolverse ao longo de todo o ano en función da demanda.
Dende o concello sublíñase a importancia de implicar as familias neste labor preventivo, xa que «precisan contar con información fiable, asesoramento profesional e ferramentas que lles permitan afrontar estas situacións e acompañar os seus fillos e fillas».
Un programa que aborda tamén as novas adiccións comportamentais
Tanto os obradoiros dirixidos á mocidade como as actividades para as familias contan cunha boa acollida e demanda. A programación incorpora unha visión ampla da prevención, que non se limita ao consumo de substancias, senón que atende tamén ás novas adiccións comportamentais vinculadas ao uso das tecnoloxías, os videoxogos, as redes sociais ou as apostas.
Os centros educativos interesados en participar poderán presentar as súas solicitudes ata finais de ano. Na medida do posible, respectaranse as datas solicitadas polos centros, seguindo a orde de recepción das peticións.
No caso das actividades para familias, as solicitudes poderán realizarse ao longo de todo o ano, en función da demanda. Se se esgotan as horas inicialmente previstas para o servizo, o Concello contempla a súa continuidade mediante a correspondente renovación, sempre que sexa posible.
Esta iniciativa busca preparar a mozos e mozas para que poidan tomar decisións con información, criterio, autoestima e ferramentas que lles permitan afrontar as situacións do seu día a día. Para máis información ou para solicitar os obradoiros, os centros educativos e as familias poden contactar co Servizo Municipal de Prevención no teléfono 982 297 498.
