Luisa Sánchez insta a acelerar a alta velocidade entre Vigo e Portugal para reforzar a competitividade da Eurorrexión

A vicepresidenta da Deputación de Pontevedra, Luisa Sánchez, participou no Foro Eurorrexión Galicia-Norte de Portugal: Polo de Competitividade, organizado este xoves pola AECT da Eurorrexión Galicia-Norte de Portugal no Tinglado do Porto de Vigo. Durante a súa intervención na mesa redonda “Infraestruturas Estratéxicas”, Luisa Sánchez defendeu a necesidade de acelerar a conexión ferroviaria de alta velocidade entre Vigo e Portugal para reforzar a competitividade da Eurorrexión. Por outra banda, salientou o proxecto dun novo paso internacional peonil e ciclista entre As Neves e Monção, sobre o río Miño, unha pasarela colgante de 84 metros de lonxitude impulsada pola Deputación en colaboración coa Cámara Municipal de Monção, cuxa construción contará cunha partida nos orzamentos provinciais de 2027.