O secretario xeral do PSdeG, José Ramón Gómez Besteiro, pediu este sábado en Mondoñedo o voto para os socialistas de cara ás eleccións xerais do próximo 29 de novembro, co obxectivo de que o acceso á vivenda deixe de ser unha eterna promesa electoral do Partido Popular e se converta nun dereito real. Acompañado pola cabeza de lista ao Congreso por Lugo, Patricia Otero, e polo número un ao Senado, César Mogo, o líder do partido puxo o foco na inacción da Xunta co patrimonio público e a rehabilitación.
Durante o acto, Besteiro denunciou que o Goberno autonómico mantén sen rehabilitar boa parte dos edificios que mercou nos cascos históricos da comarca da Mariña a través do Plan Rexurbe. Segundo lembrou, este programa foi impulsado inicialmente en 2017 e, tras nove anos e dous presidentes autonómicos diferentes, gran parte dos inmobles adquiridos seguen á espera de obras.
O exemplo máis evidente, a xuízo do dirixente socialista, é o propio municipio de Mondoñedo —a primeira área Rexurbe de Galicia, declarada en 2020—, onde a maioría dos 15 edificios comprados pola administración autonómica continúan sen recuperar. Ante esta situación, criticou que o atraso non se debe a unha falta de recursos, apuntando que a Xunta deixou sen executar o 83,5% dos fondos destinados a rehabilitación e calidade da vivenda, mentres na comarca se rexistran máis de 700 solicitudes de vivenda protexida.
Ante os anuncios en materia habitacional realizados recentemente polo Executivo galego, Besteiro foi contundente: “Antes de seguir facendo promesas de vivendas, debería rematar as que a propia Xunta xa comprou”. Como alternativa fronte aos anuncios, lembrou que o Grupo Socialista presentou unha emmienda nos orzamentos galegos para destinar 200 millóns de euros máis a vivenda, incluíndo 40 millóns para rehabilitación e 10 para potenciar o Plan Rexurbe, insistindo en que o 29-N tamén se decide o futuro residencial da mocidade e a loita contra o despoboamento.
