O vicepresidente da Deputación de Pontevedra, Rafa Domínguez, participou este mediodía na entrega dos VI Premios CREA, celebrada na Facultade de Comunicación do campus pontevedrés da Universidade de Vigo, acompañado pola vicerreitora do Campus de Pontevedra, María de los Ángeles Fernández Villarino, e do presidente do Consello Social da UVigo, Ernesto Pedrosa Silva.
Na categoría dirixida ao persoal docente e investigador, o vicepresidente entregou o premio a Sara Piñeiro Fernández polo proxecto “Esas estupendas materias duras”. Pola súa banda, na modalidade destinada ao alumnado, outorgoulle un certificado acreditativo á proposta “Creación do vídeo ensaio Terra lusogalaica de lendas e maxia”, presentada pola estudante de Comunicación Cristina Martínez Pena.
Durante o acto, Domínguez puxo en valor o compromiso da Deputación de Pontevedra con estas xornadas de investigación do Campus de Especialización CREA e incidiu na “importancia de estreitar lazos entre institucións, favorecer a transferencia do coñecemento e impulsar o emprendemento universitario”. Neste sentido, salientou o apoio da institución provincial a iniciativas que, edición tras edición, se consolidan como espazos de promoción da investigación e do talento universitario.