Representaron ao Concello nun encontro ao que asistiron outros 16 consellos locais de toda Galicia.
A Laracha estivo representada hoxe no XIV Foro de Participación Infantil e Adolescente de UNICEF celebrado no Parlamento de Galicia con motivo do Día Mundial da Infancia. Sete membros do Espazo de Participación Infantil e Adolescente (EPIA) ‘Os castrexes de Mentes Claras’ (Eva Misu, Nor Islam Hrimou Soltani, Lucía Pérez Lema, Gabriela Rodríguez Gómez, Jimena Felípez Pallas, Julia Felípez Pallas e Carmen Domínguez Fariña) participaron nesta cita. Estiveron acompañados durante a xornada polo alcalde, José Manuel López Varela, e a concelleira de Servizos Sociais, Rocío López.
O encontro reuniu representantes de 17 consellos locais de participación infantil e adolescente de toda Galicia, que tiveron a oportunidade de trasladar ás institucións as súas reflexións e propostas sobre os dereitos da infancia.
Nesta edición, que se desenvolveu baixo o lema ‘O meu día, os meus dereitos, o meu futuro’, os participantes compartiron coa vicepresidenta do Parlamento, a vicepresidenta de Unicef e a conselleira de Política Social e Igualdade as conclusións do traballo realizado previamente nos seus respectivos consellos locais. As propostas enmarcáronse na actividade ‘Estamos aquí’, impulsada por UNICEF a través do programa ‘Cidades Amigas da Infancia’, e centrada nos avances acadados no recoñecemento dos dereitos dos nenos, nenas e adolescentes, así como nos retos que aínda quedan por superar para garantir o seu cumprimento en todos os lugares.
Como parte desta iniciativa, os rapaces e rapazas tamén elaboraron e presentaron unha pancarta coas letras que conforman a mensaxe ‘ESTAMOS AQUÍ’, unha acción simbólica coa que quixeron facer visible a presenza da infancia e reivindicar o seu dereito a ser escoitada nos espazos onde se toman decisións que afectan ao seu presente e ao seu futuro.
O foro coincidiu coa conmemoración do 37.º aniversario da aprobación da Convención sobre os Dereitos do Neno, o 20 de novembro de 1989, e serviu tamén para poñer en valor a traxectoria de UNICEF, que celebrará o seu 80.º aniversario no vindeiro mes de decembro. A xornada permitiu lembrar os avances conseguidos durante estas décadas, pero tamén insistir na necesidade de seguir traballando para que todos os nenos, nenas e adolescentes poidan exercer plenamente os seus dereitos, independentemente do lugar no que vivan.
A participación neste foro dá continuidade ao traballo que desenvolve o EPIA «Os castrexes de Mentes Claras» como espazo de encontro e participación da infancia e adolescencia da Laracha, no que os máis novos poden expresar as súas opinións, compartir inquedanzas e achegar propostas sobre cuestións que lles afectan directamente.
O Concello, no Pleno celebrado o pasado 30 de outubro, xa aprobara unha Declaración institucional con motivo do Día da Infancia que se conmemora hoxe.