A deputada do BNG no Parlamento Galego, Montse Valcárcel, acompañada polo portavoz do BNG e Tenenete Alcalde do Concello de Lugo, Rubén Arroxo, mantiveron unha xuntanza coa veciñanza afectada pola planta de biometano planificada en Lugo, onde anunciaron que a iniciativa presentada polo BNG no Parlamento Galego formará parte da orde de traballos do pleno do vindeiro mércores 29.
O BNG defenderá no pleno que a Xunta retire a declaración deste proxecto como iniciativa empresarial prioritaria, unha resolución que permite a simplificación e axilización de trámites administrativos.
«Desde que se publicou o proxecto e deu comezo o período de alegacións, a veciñanza dos núcleos de poboación máis próximos están a mobilizarse pola grave afectación que a posíbel construción da planta terá nos seus fogares», afirmou Montse Valcárcel, que engadiu «trátase dunha actividade potencialmente contaminante e con malos cheiros recoñecidos no propio proxecto, que vai ser instalada a moi pouca distancia das vivendas».
Esta grave afectación recóllese expresamente no propio proxecto presentado pola empresa, que mesmo recoñece que a planta emitirá gases contaminantes así como o verquido de 76,7 m3 de augas residuais ao regato de Vilalbite, un afluente do río Miño.
«Distintos informes técnicos consideran que o actual proxecto que pretende instalarse en Coeses non ten garantías de seguridade ambiental, atendendo ao volume de auga que precisaría captar e ao tratamento dos residuos líquidos que logo serían devoltos ao río e, especialmente, na falta de eficiencia no control de cheiros», explicou a deputada do BNG, que destacou que «esta falta de seguranza tamén foi sinalada polo informe provisional emitido pola Confederación Hidrográfica Miño-Sil, un informe desfavorable ao proxecto por considerar que o tratamento das augas residuais e a súa posterior evacuación a través do rego de Vilalbite non ten suficientes garantías».
Segundo distintas informacións, a empresa promotora ten a intención de solicitar o financiamento do proxecto con cargo a fondos europeos, a pesar dos efectos negativos que terá para o medio e para os veciños e veciñas.
