O vindeiro xoves, 14 de agosto, o proxecto Aloumiños celebrará un almorzo informativo no Centro Sociocultural de Vilaño para dar a coñecer as súas actividades á cidadanía. A iniciativa, impulsada polo Colexio de Educadoras e Educadores Sociais de Galicia e o Sergas, busca mellorar a saúde e o benestar da poboación a través da intervención sociocomunitaria.
O Concello apoia este proxecto por consideralo de gran interese para tecer relacións sociais e favorecer o envellecemento activo na veciñanza.
Un proxecto contra a soidade non desexada
O proxecto Aloumiños está dirixido principalmente a persoas maiores de 50 anos, pero está aberto a toda persoa interesada. As súas actividades céntranse na prevención e redución da soidade non desexada e na promoción das relacións sociais. A programación inclúe:
- Andainas na natureza.
- Sesións de benestar emocional.
- Exercicios cardiovasculares e obradoiros sociosanitarios.
- Actividades culturais e de lecer.
Información e inscricións
O almorzo informativo terá lugar o xoves 14 de agosto, de 10:00 a 12:00 horas. O obxectivo é explicar as actividades que se realizarán nos vindeiros meses e facilitar unha primeira toma de contacto entre as persoas interesadas en participar.
A inscrición é gratuíta e pode formalizarse a través de dúas vías:
- Chamando por teléfono ao 698 178 441.
- De forma presencial no departamento de Servizos Sociais do Concello (Edificio Administrativo da Laracha).
