O BNG reivindicou hoxe, no cemiterio de Santo Amaro, o legado de Pedro Galán Calvete, dirixente das Mocidades Galeguistas do Partido Galeguista da Coruña, asasinado en 1936 con só 19 anos. A homenaxe, organizada polo grupo de barrio de Monte Alto e Galiza Nova, tivo lugar nun momento de «medre da ultradereita», segundo o partido.
O historiador Manuel Rei sinalou que o compromiso cos ideais de «emancipación social e nacional» que encarnaron figuras como Castelao e Bóveda son o antídoto para frear as «ideas reaccionarias». «Temos que ter moi presentes sempre as leccións de Castelao -do cal este 2025 celebramos o 75 aniversario do seu pasamento-, Bóveda e o mozo Pedro Galán Calvete», afirmou Rei.
Anxo Vázquez, responsable comarcal de Galiza Nova, destacou que «A Coruña e o barrio de Monte Alto senten orgullo por ter tido como veciño Pedro Galán Calvete». O mozo, alén do seu compromiso político, foi un activista social, participando na fundación do Club de Mar de Santo Amaro.
«Nin A Coruña nin Monte Alto esquecen nin esquecerán nunca o seu asasinato», declarou Vázquez.
O acto, que se realizou diante da tumba do mozo galeguista, incluíu unha ofrenda floral da familia de Galán Calvete e a actuación do grupo de gaitas da Asociación Veciñal de Atochas Monte Alto, que interpretou a marcha do antigo Reino de Galiza e o himno nacional galego.
