A asociación Mulleres Salgadas quere manifestar publicamente a súa fonda preocupación polas recentes informacións sobre o despedimento da secretaria da Confraría de Vilanova de Arousa.
Aínda que a organización sinala que non lle corresponde entrar en valoracións sobre un caso actualmente xudicializado, subliña que é unha obriga democrática garantir procedementos transparentes e con plenas garantías procesuais dentro das institucións do sector.
Neste sentido, a asociación reclama:
- Explicacións claras: Informe sobre como se instruíu o expediente e baixo que criterios técnicos e legais se executou a decisión.
- Supervisión pública: Unha chamada directa á Consellería do Mar e á Xunta de Galicia para que exerzan a súa función de control e tutela sobre as confrarías.
Dende Mulleres Salgadas advirten que as profesionais do mar non poden quedar expostas á desprotección que xera a opacidade institucional. A asociación é tallante ao afirmar que «a falta de transparencia nas confrarías ten xénero», e que estas situacións de desigualdade non poden seguir sendo invisibilizadas no sector pesqueiro galego.
