Lugo celebra unha nova edición da Ofrenda do Antigo Reino de Galicia, declarada Ben de Interese Cultural

A cidade de Lugo converteuse este domingo no punto de encontro das antigas capitais do Reino de Galicia coa celebración da tradicional Ofrenda do Antigo Reino ao Santísimo Sacramento. Trátase dunha cerimonia única, declarada Ben de Interese Cultural, que constitúe unha das expresións máis singulares do patrimonio histórico, cultural e institucional galego.

A xornada comezou coa recepción oficial na Casa do Concello, presidida pola alcaldesa de Lugo, Elena Candia, na que participaron o alcalde de Tui e oferente deste ano, Enrique Cabaleiro González, e o alcalde de Mondoñedo, Manuel Ángel Otero. As cidades da Coruña, Betanzos, Ourense e Santiago de Compostela estiveron representadas por membros das súas respectivas corporacións municipais. Durante o acto, tivo lugar o intercambio de agasallos institucionais e a sinatura, por parte do Delegado Rexio, no Libro de Honra do Concello.

Tras a recepción, a comitiva desprazouse ata a Catedral, onde se oficiou a solemne misa e a tradicional Ofrenda do Antigo Reino de Galicia ao Santísimo Sacramento, que correu a cargo do alcalde de Tui en representación das sete antigas capitais históricas

.Á celebración asistiron numerosas autoridades, entre elas o presidente da Xunta de Galicia, Alfonso Rueda; a vicepresidenta do Parlamento de Galicia, Raquel Arias; a conselleira do Medio Rural, María José Gómez; así como representantes do Senado, do Congreso, da cámara autonómica, da Deputación, da Subdelegación do Goberno, da corporación municipal lucense, ademais de mandos das forzas de seguridade, autoridades militares e membros de institucións civís e relixiosas.

Unha tradición centenaria

A Ofrenda ten a súa orixe no voto solemne realizado polas sete cidades do Antigo Reino de Galicia no ano 1669. Desde entón, os representantes das capitais galegas renovan cada ano este compromiso, convertendo a Lugo no escenario dunha tradición que forma parte da memoria colectiva de Galicia.

Rematada a eucaristía, a xornada continuou coa tradicional procesión. A dimensión patrimonial foi protagonista grazas á interpretación da Marcha Solemne do Antigo Reino de Galicia, que acompañou á comitiva. O desfile estivo encabezado polo grupo Os Xílgaros, mentres que a Asociación Cultural e Xuvenil do Traxe Tradicional de Tui pechou o cortexo.

Durante o percorrido destacaron as danzas procesionais de arcos e castañolas interpretadas pola Escola de O Xeito. Os tradicionais arcos de cores, inspirados no Arco da Vella, ofreceron unha das estampas máis características dunha celebración que combina historia e simbolismo. A procesión contou tamén coa participación de integrantes do grupo etnográfico Traxandaina, que luciron traxes tradicionais, contribuíndo a poñer en valor o patrimonio inmaterial de Galicia. Neste contexto, a alcaldesa de Lugo participou no acto vestindo un traxe tradicional cedido pola devandita asociación, nun xesto de compromiso coa preservación dos sinais de identidade cultural.

Para rematar, Elena Candia destacou a importancia de seguir promovendo esta cerimonia, un legado único que, máis de tres séculos despois do seu nacemento, continúa plenamente vivo grazas ao esforzo conxunto das institucións e da cidadanía.